ជប៉ុន រកឃើញថ្ងៃដែលគ្មានអ្នកស្លាប់ដោយសារកូវីដ ជាលើកដំបូង ក្នុងរយៈពេល ១៥ ខែ

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា ប្រទេសជប៉ុនមិនមានអ្នកស្លាប់ប្រចាំថ្ងៃពីជំងឺកូវីដ ១៩ ជាលើកដំបូងក្នុងរយៈពេលជាងមួយឆ្នាំកាលពីថ្ងៃអាទិត្យ ។

បើយោងតាមការបូកទិន្នន័យសរុបរបស់ទូរទស្សន៍ជាតិ NHK បានឲ្យដឹងថា គិតត្រឹមថ្ងៃអាទិត្យ មិនមានថ្ងៃណាដែលគ្មានអ្នកស្លាប់ ដោយសារជំងឺកូវីដ ១៩ ទេ ចាប់តាំងពីថ្ងៃទី ២ ខែសីហា ឆ្នាំ ២០២០ មក ពោលរយៈពេល ១៥ ខែ ខណៈតួលេខចុងក្រោយរបស់ក្រសួងសុខាភិបាល បង្ហាញពីអ្នកស្លាប់ចំនួន ៣ នាក់កាលពីថ្ងៃសៅរ៍ ។

ទន្ទឹមនោះ ករណីឆ្លង និងការស្លាប់ដោយសារកូវីដបានធ្លាក់ចុះយ៉ាងខ្លាំងនៅទូទាំងប្រទេសជប៉ុន ខណៈដែលការចាក់វ៉ាក់សាំងបានកើនឡើងជាង ៧០ ភាគរយនៃចំនួនប្រជាជន ។

ស្របពេលជាមួយគ្នា ដើម្បីទប់ទល់នឹងការផ្ទុះងើបឡើងវិញដែលអាចកើតមានក្នុងរដូវរងានេះ រដ្ឋាភិបាលគ្រោងនឹងចាប់ផ្តើមការចាក់វ៉ាក់សាំងបង្ការនៅខែក្រោយ ហើយកំពុងធ្វើការដើម្បីធានាការព្យាបាលដោយផ្អែកលើថ្នាំគ្រាប់សម្រាប់ករណីស្រាល ដើម្បីកាត់បន្ថយការសម្រាកព្យាបាលនៅមន្ទីរពេទ្យ ។

គួរបញ្ជាក់ថា ករណីឆ្លងថ្មីប្រចាំថ្ងៃបានឡើងដល់កំពូលជាង ២៥,០០០ ករណី ក្នុងអំឡុងពេលរលកឆ្លងកាលពីខែសីហា ដែលជំរុញដោយវីរុសបំប្លែងខ្លួន Delta ហើយប្រទេសនេះមានអ្នកស្លាប់ដោយសារកូវីដច្រើនជាង ១៨,០០០ នាក់ ក្នុងអំឡុងពេលនៃជំងឺរាតត្បាតមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ក្រុមហ៊ុនផលិតថ្នាំកូវីដលេបមួយថ្ងៃមួយគ្រាប់ ជប៉ុន នឹងតេស្តវ៉ាក់សាំងមួយទៀតនៅ វៀតណាម