កម្ពុជាថយចំនួនអ្នកឆ្លងកូវីដ-១៩ថ្មីត្រឹម ៤០នាក់​ ខណៈអ្នកស្លាប់ចំនួន ៥នាក់

ក្រសួងសុខាភិបាល បានប្រកាសរកឃើញអ្នកឆ្លងជំងឺកូវីដ-១៩ថ្មី ចំនួន ៤០នាក់ ក្នុងនោះអ្នកស្លាប់មានចំនួន ៥នាក់(មិនបានចាក់វ៉ាក់សាំង៣នាក់)។ រីឯអ្នកជាសះស្បើយមានចំនួន ៣៧នាក់។ នេះបើតាមសេចក្តីប្រកាសរបស់ក្រសួងផ្សព្វផ្សាយនៅថ្ងៃទី ២០ ខែវិច្ឆិកានេះ។

គិតត្រឹមថ្ងៃសៅរ៍នេះ កម្ពុជាមានអ្នកឆ្លងជំងឺកូវីដ-១៩ សរុបចំនួន ១១៩.៨២៦នាក់ អ្នកជាសះស្បើយមានចំនួន  ១១៦.២០៧នាក់ និងអ្នកស្លាប់សរុប ២.៨៩៦នាក់។ជំងឺកូវីដ-១៩ នៅកម្ពុជា ថមថយការឆ្លងរីករាលដាលជាលំដាប់ ចាប់តាំងពីកម្ពុជា សម្រុកចាក់វ៉ាក់សាំងគ្រប់គោលដៅដែលបានកំណត់។

សូមបញ្ជាក់ថា អត្រាចាក់វ៉ាក់សាំងកូវីដ-១៩ នៅកម្ពុជា  គិតត្រឹមថ្ងៃទី១៩ ខែវិច្ឆិកា ឆ្នាំ២០២១ប្រជាជនអាយុពី ១៨ឆ្នាំឡើង មាន ១០០,៦៨% ធៀបជាមួយចំនួនប្រជាជនគោលដៅ ១០លាននាក់, កុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៩៨,៥៦% ធៀបជាមួយចំនួនប្រជាជនគោលដៅ ១,៨២៧,៣៤៨ នាក់, កុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០៣,៩៨% ធៀបជាមួយនឹងប្រជាជនគោលដៅ ១,៨៩៧, ៣៨២ នាក់, កុមារអាយុ ០៥ឆ្នាំ មាន ៨១,១៨% ធៀបជាមួយនឹងប្រជាជនគោលដៅ ៣០៤,៣១៧ នាក់។ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាន នាក់  មាន ៨៨,០៦% ៕

អត្ថបទ៖ ទួន សុផល