ទីតាំង​លក់ថ្នាំ​ពេទ្យ​នៅរាជធានីភ្នំពេញ​ពោរពេញ​ទៅដោយ​គ្រួសារ​អ្នកជំងឺ​កូវីដ​ទៅ​ទិញថ្នាំ

ខណៈដែលការឆ្លងជំងឺកូវីដ១៩ បំប្លែងថ្មី អូមីក្រុងកើនឡើងជារៀងរាល់ថ្ងៃ រហូតដល់ ៧៣៦នាក់ កាលពីថ្ងៃទី​ ២០​ ខែកុម្ភៈមកគេសង្កេតឃើញអ្នកជំងឺដែលចង់ព្យាបាលនៅតាមផ្ទះក៏សម្រេចឲ្យក្រុមគ្រួសារទៅទិញថ្នាំពេទ្យសម្រាប់ព្យាបាលជំងឺនៅផ្ទះ។

តាមការអះអាងពីបងស្រី វង់ ភក្តី រស់នៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញបានឲ្យដឹងថា ក្រុមគ្រួសារគាត់មានសមាជិកម្នាក់មានវិជ្ជមានកូវីដ១៩ បំប្លែងខ្លួនថ្មីហើយគាត់បានសុំអាជ្ញាធរព្យាបាលនៅផ្ទះដោយសារតែផ្ទះរបស់គាត់ធំទូលាយនឹងមានបន្ទប់ច្រើនសម្រាប់ឲ្យអ្នកជំងឺរស់នៅដាច់ដោយឡែកងាយស្រួលព្យាបាល។ បងស្រីបញ្ជាក់ទៀតថា ស្ថានភាពអ្នកជំងឺក្នុងគ្រួសាររបស់គាត់មិនសូវធ្ងន់ធ្ងរផងនោះ។

ទាក់ទិនទៅនឹងការវិវត្តន៍ នៃអ្នកឆ្លងជំងឺកូវីដ១៩ ប្លែងខ្លួនថ្មីនេះលោក គ្រី ហ៊ុច មន្ត្រីប្រចាំការសាលាខណ្ឌច្បារអំពៅបានបញ្ជាក់ថា នៅក្នុងមូលដ្ឋានខណ្ឌច្បារអំពៅនាប៉ុន្មានថ្ងៃនេះគឺចាប់ផ្តើមកើនឡើងគួរសមដែលជាមធ្យម៣០នាក់ចុះ។ហើយក្នុងនោះលោក ចេង មុនីរ៉ា អភិបាលខណ្ឌច្បារអំពៅ បានចាត់តាំងកម្លាំងអាជ្ញាធរទាំង ៨ សង្កាត់ឲ្យធ្វើការផ្សព្វផ្សាយពីវិធានការទប់ស្កាត់ការឆ្លងរាលដាលនៃជំងឺនេះនឹងបានចែកថ្នាំព្យាបាលដល់អ្នកជំងឺដែលមានស្ថានភាពស្រាល។

ចំណែកអ្នកជំងឺមានស្ថានភាពធ្ងន់ធ្ងរគឺរួសរាន់យករថយន្តសង្រ្គោះរបស់មន្ទីរពេទ្យបង្អែក ខណ្ឌច្បារអំពៅ ដឹកយកទៅព្យាបាលនៅមន្ទីរពេទ្យរដ្ឋភ្លាមៗដោយពុំបង្អែបង្អង់ឡើយ៕

អត្ថបទ៖ នរា