ជំងឺកូវីដ-១៩ នៅខណ្ឌច្បារអំពៅ ថយចុះពីចំនួន ៨០នាក់ មកត្រឹម ៣នាក់ ក្នុង ១ថ្ងៃ

ភ្នំពេញ៖ តាមប្រភពច្បាស់ការណ៍ពីមន្ត្រីទទួលបន្ទុកការឆ្លងជំងឺកូវីដ-១៩ បំលែងថ្មីអូមីក្រុង នាថ្ងៃទី៤ ខែមីនានេះ ជំងឺកូវីដ បានថមថយច្រើនដែលមិននឹកស្មានដល់ ពីចំនួន ៨០នាក់មកនៅត្រឹម ៣នាក់ ក្នុង ១ថ្ងៃ។

លោក យី ធីរ៉ាត់ នាយករងរដ្ឋបាលសាលាខណ្ឌច្បារអំពៅ បានឱ្យដឹងទៀតថា កាលពីអំឡុងខែកុម្ភៈ ឆ្នាំ២០២២នេះ បើគឹតត្រឹមថ្ងៃទី២៤ គឺមានអ្នកឆ្លងជំងឺកូវីដ-១៩ បំលែងខ្លួនថ្មី អូមីក្រុង នៅក្នុងមូលដ្ឋានខណ្ឌច្បារអំពៅ មានរហូតដល់៨០នាក់ ក្នុងរយៈពេលតែមួយថ្ងៃ។ ប៉ុន្តែដោយសារតែប្រជាពលរដ្ឋមានការប្រុងប្រយ័ត្ន និងថែទាំសុខភាព ពិសេសនាំគ្នាអនុវត្តតាមវិធានការណ៍ទប់ស្កាត់ពីជំងឺឆ្លង តាមរយៈការផ្សព្វផ្សាយពីក្រសួងសុខាភិបាលរួចមក ទើបការឆ្លងរាលដាលក្នុងសហគមន៍ក្នុងមូលដ្ឋានខណ្ឌច្បារអំពៅ នៅសល់ត្រឹម ៣នាក់ ហើយថ្ងៃខ្លះសឹងតែពុំមានសោះឡើយ។

លោក យី ធីរ៉ាត់ បានបញ្ជាក់ថា លោកសូមកោតសសើដល់ស្មារតីទទួលខុសត្រូវខ្ពស់ពីសំណាក់អាជ្ញាធរសង្កាត់ទាំង ៨ ក្នុងមូលដ្ឋានខណ្ឌច្បារអំពៅ ដែលតែងតែចុះអប់រំ ផ្សព្វផ្សាយពីការថែរក្សាសុខភាពតាមខ្នងផ្ទះប្រជាពលរដ្ឋ ព្រមទាំងបាននាំយកអំណោយថ្នាំពេទ្យដល់ប្រជាពលរដ្ឋដែលខ្វះខាតជីវភាពថែមទៀតផង៕

អត្ថបទ៖ នរា