កូវីដ-១៩

លោក ហេង វ៉ាន់ដា ៖ មានសាលាឯកជន ៥ ទៅ ៦ សាលា បានបិទទ្វារដោយសារវិបត្តិជំងឺកូវីដ-១៩

បានផុស

៣ years មុន

នៅ

ថ្ងៃអាទិត្យ ១៥ ឧសភា ២០២២

ដោយ

លោកបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជា បានមានប្រសាសន៍នៅព្រឹកថ្ងៃទី ១៥ ឧសភានេះថា មានគ្រឹះស្ថានសិក្សាឯកជនប្រមាណពី ៥ ទៅ ៦ សាលាបានបិទទ្វារលែងដំណើរការបន្តទៀត ដោយសារផលប៉ះពាល់ នៃជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតបានបន្តថា «រហូតមកដល់ពេលនេះសាលាដែលបានផ្អាកដំណើរការនៅពេលប្រទេសកម្ពុជាមានជួបវិបត្តិជំងឺកូវីដ-១៩ ធ្ងន់ធ្ងរនោះ បានបិទជាស្ថាពរហើយ ដោយសារពួកគាត់បានស្នើសុំដកបេក្ខភាពពីសមាគមតែម្ដង ប្រហែលជា ៥ ទៅ ៦ សាលា»។

លោកបណ្ឌិតបានបន្តទៀតថា ការបិទទ្វាររបស់សាលាទាំងនោះ ដោយសារការរាតត្បាតជំងឺកូវីដ-១៩ មានរយៈពេលយូរ ដែលធ្វើឲ្យពួកគាត់មិនអាចទ្រទ្រង់នឹងការខាតបង់ជាប្រចាំខែបាន ពីព្រោះគាត់ត្រូវចំណាយទៅលើថ្លៃអគារ ថ្លៃបុគ្គលិក និងសម្ភារៈបរិក្ខារផ្សេងៗ។

លោកបណ្ឌិតបានបន្ថែមទៀតថា រហូតមកដល់ពេលនេះ ក៏នៅមិនទាន់មានសាលាថ្មីណាមួយបើកដំណើរការដែរ ពោលគឺមានតែសាលាដែលបានបើកកន្លងមកនៅក្នុងកំឡុងជំងឺកូវីដ ដែលរៀនតាមអនឡាញ ហើយពួកគេបានកំពុងបង្កើនសកម្មភាពបន្ថែម ដើម្បីទាក់ទាញសិស្សចូលរៀនឲ្យបានច្រើនប៉ុណ្ណោះ។

យោងតាមរបាយការណ៍របស់ក្រសួងអប់រំយុវជន និងកីឡា បានឲ្យដឹងថា គិតត្រឹមឆ្នាំសិក្សា ២០២១-២០២២ នេះ កម្ពុជា មានសាលាមត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ និងឯកជនមានចំនួន ១៨,៤៣០ ក្នុងនោះ មត្តេយ្យសិក្សាសហគមន៍ ៣.០៨៣ កន្លែង, គ្រឹះស្ថានសិក្សាចំណេះទូទៅសាធារណៈ ១៣.៦៨១, និងគ្រឹះស្ថានសិក្សាឯកជន ១.៦៦៦នាក់។

ក្នុងនោះមានសិស្សសរុបចំនួន ៣.៥៨៩.០២៥ នាក់ សិស្សស្រី ៥០,៤ ភាគរយ ក្នុងនោះសិស្ស មត្តេយ្យសិក្សាសហគមន៍ ៧១.៣៩៩នាក់ ស្រី ៥១,៧ ភាគរយ, សិស្សគ្រឹះស្ថានសិក្សាចំណេះទូទៅសាធារណៈ ៣.២៧៧,០៧៦ នាក់ ស្រី ៥០,៤ ភាគរយ, និងសិស្សគ្រឹះស្ថានសិក្សាឯកជន ២៤០៥៥០ នាក់ ស្រី ៤៩,០ ភាគរយ។

ចំណែកគ្រឹះស្ថានឧត្តមសិក្សាសរុបមានចំនួន ១៣០ ក្នុងនោះគ្រឹះស្ថានឧត្តមសិក្សាសាធារណៈ ៤៨ និងគ្រឹះស្ថានឧត្តមសិក្សាឯកជន ៨២។ និស្សិតកំពុងសិក្សានៅកម្រិតឧត្ដមសិក្សាសរុបមានចំនួន ១៩៨.៣៦៣ នាក់ ស្រី ៤៩,៧ ភាគរយ៕

អត្ថបទ ៖ សំអឿន