ពេជ្រ សោភា៖ បើស្រលាញ់អាណិតពុកម៉ែ កុំនាំកូវីដទៅរកគាត់ ឃ្លាតមួយពេលខ្លី កុំឲ្យឃ្លាតគ្មានថ្ងៃជួប

តារាចម្រៀង ពេជ្រ សោភា ឈានចូលដល់នៃឱកាសពិធីបុណ្យចូលឆ្នាំថ្មី ប្រពៃណីជាតិខ្មែរនេះ ក្រៅតែពីបួងសួង​សុំ​សេច​ក្តីសុខជូនប្រជាពលរដ្ឋទូទាំងប្រទេសឲ្យរួចចាកផុតជំងឺកូវីដ-១៩ នាងក៏បានអំពាវនាវឲ្យប្រុងប្រយ័ត្ន និងអវត្តតាមការណែនាំរបស់ក្រសួងសុខាភិបាលផងដែរ។

តារាស្រីអ្នកនាង ពេជ្រ សោភា បានធ្វើការថ្លែងសារបំផុសស្មារតីមហាជនដោយបានលើកឡើងថា​ បើបងប្អូនស្រលាញ់ហើយអាណិតឪពុកម្តាយនៅស្រុក សូមកុំនាំកូវីដ-១៩ទៅរកគាត់ ព្រោះឃ្លាតមួយពេលខ្លីកុំឲ្យឃ្លាតគ្មានថ្ងៃជួប។

ពេជ្រ សោភា បានលើកឡើងទៀតថា “សូមបងប្អូនទាំងអស់រួមគ្នាការពារ និងត្រូវយល់ពីគ្រួសារ ហើយអាណិតឪពុកម្តាយចាស់ៗនៅផ្ទះ បើនឹកគាត់ស្រលាញ់គាត់ កុំនាំកូវីដ១៩ ទៅរកគាត់ ឃ្លាតគ្នាពេលខ្លី កុំឲ្យឃ្លាតគ្នាគ្មានថ្ងៃបានជួបគ្នាវិញ។

បន្ថែមពីនេះ ពេជ្រ សោភា បាននិយាយដែរថា កូវីដ១៩មិនស្គាល់អ្នកណាម្នាក់នោះទេ ឲ្យតែប្រហែសវានឹងប្រហារ ត្រូវចាំថា យើងមិនអាចមើលឃើញកូវីដ តែកូវីដ តែងតែរងចាំយើង តែយើងក៏អាចរួមគ្នាទប់ស្កាត់បាន ផ្តើមពីយើងទាំង អស់គ្នា សូមអនុត្តតាមវិធាន ៣កុំ ៣ការពារ៕

អត្ថបទ ៖ ចាន់រ៉ា