ជីវិតកម្សាន្ដ

ស្អែកនេះ ដេននី ក្វាន់ ជួបពិភាក្សាជាមួយមេធាវីលើបណ្ដឹងប្រឆាំងម្ចាស់សណ្ឋាគារ ព្រោះតែសំណង ១ ម៉ឺនដុល្លារជារឿងអយុត្តិធម៌

បានផុស

៣ years មុន

នៅ

ថ្ងៃពុធ ២៦ ឧសភា ២០២១

ដោយ

តារាសម្ដែងកញ្ញា ដេននី ក្វាន់ បានថ្លែង ប្រាប់កម្ពុជាថ្មីតាមរយ:ការឆ្លើយឆ្លងហ្វេសប៊ុកថានៅថ្ងៃទី ២៧ ខែ ឧសភា ស្អែកនេះនាងនិងជួបពិភាក្សាជាមួយមេធាវីដើម្បីរកនីតិវិធីឬច្រកចេញថ្មី លើបណ្ដឹងប្រឆាំងនឹងម្ចាស់សណ្ឋាគារមួយនៅក្រុងព្រះសីហនុ ដែលបានបង្កប់កាមេរ៉ា ថតសកម្មភាពនាងនៅក្នុងបន្ទប់គេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាសម្ដែងស្រីរូបស្រស់កញ្ញា ដេននី ក្វាន់ បានលើកឡើងបែបនេះថា ” កិត្តិយសខ្ញុំសំខាន់ណាស់ ត្រឹមសំណង ១ ម៉ឺនដុល្លារជារឿងអយុត្តិធម៌បំផុត ដូច្នេះត្រូវតែមានដំណោះស្រាយថ្មីឬសំណងដែលសមស្របមួយសម្រាប់ខ្ញុំដែលមនុស្សស្រីជនរងគ្រោះ”។

កញ្ញា ដេននី ក្វាន់បន្តថា ចំពោះការ ជួបពិភាក្សាជាមួយមេធាវីជាថ្មីនេះ គឺបន្ទាប់តុលាការចេញដីកាបង្គាប់ឲ្យចុងចោទបង់ប្រាក់សងជំងឺចិត្តត្រឹមតែចំនួន ១ ម៉ឺនដុល្លារប៉ុណ្ណោះ ប៉ុន្តែនាងមិនព្រមទទួលយក ដោយនៅក្នុងពាក្យបណ្ដឹងរបស់នាងបានប្ដឹងទាមទារសំណងចំនួន១០ម៉ឺនដុល្លារ ហើយសូមឲ្យផ្ដន្ទាទោសអ្នកប្រព្រឹត្តិតាមផ្លូវច្បាប់។

ដេននី ក្វាន់ បានបញ្ជាក់ថានៅថ្ងៃកើតហេតុនោះទាំង៣បន្ទប់ដែលជួលគេងគឺមានបន្ទប់នាង, បន្ទប់ប្អូននិងបន្ទប់តៃកុងឡាន សុទ្ធតែរកឃើញមានបង្កប់កាមេរ៉ាទាំងអស់។ នាងសង្ឃឹមថាច្បាប់នឹងមានយុត្តិធម៌សម្រាប់ជនរងគ្រោះដូចជារូបនាងផ្ទាល់នេះដែរ។

តារាស្រី ដេននី ក្វាន់ បន្តទៀតថា ពេញមួយយប់គឺនៅក្នុងបន្ទប់គេងនោះនាងប្រលែងខ្លួនទាំងអស់ ព្រោះដោយគិតថាវាមានសុវត្ថិភាពសម្រាប់យើង ប៉ុន្តែម្ចាស់សណ្ឋាគារបានរំលោភសិទ្ធឯកជននាងយ៉ាងធ្ងន់ធ្ងរ ដោយហេតុថាសកម្មភាពអាក្រាតកាយរបស់នាងទាំងអស់ត្រូវបានចាប់យកដោយកាមេរ៉ាដែលបានដាក់បង្កប់នៅក្នុងបន្ទប់សណ្ឋាគារ។

សូមបញ្ជាក់ថា កញ្ញា ដេននី ក្វាន់ នៅ ថ្ងៃ ទី ២៥ ខែ ឧសភា ម្សិលមិញបាន ទម្លាយនូវរឿងម្ចាស់សណ្ឋាគារមួយ នៅ កំពង់សោម ឈ្មោះ Gold Sea Hotel លួចបង្កប់ Camera ក្នុងបន្ទប់គេងរបស់នាងនិងបន្ទប់ផ្សេងៗទៀតអំឡុងពេលដែលនាងទៅស្នាក់នៅទីនោះកាលពីខែ តុលា ឆ្នាំ ២០២០។

តារាស្រី កញ្ញា ដេន នី ក្វាន់ បានបញ្ជាក់ថានាងទ្រាំមិនឡាយជាសាធារណៈទេ ព្រោះរង់ចាំដំណោះស្រាយល្អជាមួយម្ចាស់សណ្ឋាគារ តែលទ្ធផលនាងទទួលបានសំណងជាលុយត្រឹម ១ ម៉ឺនដុល្លារប៉ុណ្ណោះ។ នេះជារឿងអយុត្តិធម៌ណាស់សម្រាប់កិត្តិយសនាងជាជនរងគ្រោះ។

ជុំវិញរឿងរ៉ាវនេះដែរស្នងការខេត្តព្រះសីហនុ លោក ជួន ណារិន្ទ បានប្រាប់កម្ពុជាថ្មីនៅល្ងាចថ្ងៃទី ២៥ ខែ ឧសភា ថាករណីនេះគឺជាសំណុំរឿងចាស់តាំងពីខែ តុលា ឆ្នាំ ២០២០ ដែលតុលាការបានសម្រេចក្តីរួច ហើយខណៈដែលជន ដែលពាក់ព័ន្ធនឹងការបង្កប់កាមេរ៉ាក្នុងបន្ទប់សណ្ឋាគារនោះក៏កំពុងតែអនុវត្តទោសក្នុងពន្ធនាគារនៅឡើយ៕

អត្ថបទ៖ចាន់រ៉ា

ចុចអាន៖ដេននី ក្វាន់ បង្ហាញពីចំណុចCameraបង្កប់នៅ សណ្ឋាគារសមុទ្រមាសដែលរកឃើញនៅក្នុងបន្ទប់ដេក

ចុចអាន៖មកស្គាល់ថៅកែម្ចាស់សណ្ឋាគារសមុទ្រមាស ដែលដាក់បង្កប់កាមេរ៉ាក្នុងបន្ទប់សណ្ឋាគារនៅព្រះសីហនុ