តារាសម្តែង វ៉ាយុ បកស្រាយពីផលប៉ះពាល់ធ្ងន់ធ្ងរដល់អាជីពសិល្បៈដោយសារផ្ទុះព័ត៌មានមិនពិតមួយ

តារាបង្ហាញម៉ូតនិងជាតារាសម្តែងប្រុស លោក ទឹម វ៉ាយុ បានចេញមុខរៀបរាប់ពីបទពិសោធន៍និងផលប៉ះពាល់ធ្ងន់ធ្ងរមកលើអាជីពសិល្បៈរបស់ខ្លួន ក្រោយពីមានសារព័ត៌មានចុះផ្សាយព័ត៌មានមិនពិតពីរូបលោក។ 

លោកបានឱ្យដឹងថា រឿងរ៉ាវនោះបានកើតឡើងក្នុងអំឡុងផ្ទុះព្រឹត្តការណ៍ឆ្លងសហគមន៍ ២០ កុម្ភៈ ដែលកាលនោះមានសិល្បករ និងសិល្បការិនីមួយចំនួនបែកធ្លាយថា ឆ្លងជំងឺកូវីដ១៩។ ក្នុងនោះ លោក វ៉ាយុ គឺជាជនរងគ្រោះនៃការផ្សព្វផ្សាយព័ត៌មានមិនពិតមួយដែលថា លោកបានឆ្លងជំងឺកូវីដ-១៩។ 

តារាសម្តែងរូបនេះបានថ្លែងប្រាប់នៅក្នុងកិច្ចសម្ភាសពិសេសជាមួយអង្គភាពសារព័ត៌មានកម្ពុជាថ្មីថា ព័ត៌មានបានយករូបភាពចាស់ទៅបំប៉ោងថា លោកបានឆ្លងជំងឺកូវីដ-១៩ ប៉ុន្តែការពិតលោកមិនបានឆ្លងជំងឺនោះឡើយ ពោលគឺលោកបានគោរពតាមការណែនាំរបស់ក្រសួងសុខាភិបាលយ៉ាងខ្ជាប់ខ្ជួន មិនបានចេញទៅក្រៅជួបជុំទេ។ 

លោកបន្ថែមថា ការផ្សព្វផ្សាយព័ត៌មានមិនពិតមួយនេះ ពិតជាមានផលប៉ះពាល់ដល់កិត្តិយស និងអាជីពសិល្បៈរបស់ខ្លួនយ៉ាងធ្ងន់ធ្ងរ។ អ្វីដែលសំខាន់ សារព័ត៌មានដែលចុះផ្សាយនោះ មិនបានសាកសួរ ឬស្នើសុំការអនុញ្ញាតក្នុងការយករូបភាពនោះទៅចុះផ្សាយនោះទេ។ 

លោកបានអំពាវនាវដល់អ្នកសារព័ត៌មាន និងអ្នកប្រើប្រាស់បណ្តាញសង្គមទាំងអស់ បញ្ឈប់ការផ្សព្វផ្សាយ និងចែករំលែកព័ត៌មានមិនច្បាស់លាស់ ដែលបង្ករចលាចលដល់បុគ្គលដទៃ ជាពិសេសសង្គមទាំងមូល។ 

ចង់ដឹងថា តារាបង្ហាញម៉ូដ លោក ទឹម វ៉ាយុ ផ្តល់ព័ត៌មានលម្អិតយ៉ាងណា សូមរង់ចាំទស្សនាវីដេអូកិច្ចសម្ភាសពិសេស ដែលមានចាក់ផ្សាយនៅក្នុងពេលឆាប់ៗនេះ លើទំព័រហ្វេសប៊ុកផេកកម្ពុជាថ្មីតែមួយគត់៕ 

អត្ថបទដោយ៖ Jacqueli