តុលាការចោទ តារាសម្ដែង អេដវីន ពីបទហិង្សាដោយសហព័ទ្ធ អាចប្រឈមជាប់ពន្ធនាគាររហូត៥ឆ្នាំ

តំណាងអយ្យការអមសាលាដំបូងរាជធានីភ្នំពេញ នៅថ្ងៃទី ២៣ ខែមិថុនា ឆ្នាំ ២០២១ បាន សម្រេចជាផ្លូវការចោទប្រកាន់តារាសម្ដែង “អេដវីន” ពីបទ ហិង្សាដោយសហព័ទ្ធ តាមមាត្រា ២២២ នៃ ក្រមព្រហ្មទណ្ឌ។ សំណុំរឿងក្ដីនេះ ត្រូវបានបញ្ជូនទៅចៅក្រមស៊ើបសួរបន្តនីតិវិធី។

យោងតាមមាត្រា ២២២ បើតុលាការរកឃើញថាជនដៃឆ្នើម បានប្រព្រឹត្តដូចការចោទប្រកាន់មែននោះអ្នកប្រព្រឹត្ត នឹងត្រូវជាប់ពន្ធនាគារពី ២ ឆ្នាំទៅ ៥ ឆ្នាំ និងពិន័យជាប្រាក់ពី ៤ លាន រៀលទៅ ១០ លានរៀល។

មាត្រា ២២២ នៃ ក្រមព្រហ្មទណ្ឌ ចែងថា ៖ “អំពើហិង្សាប្រព្រឹត្តដោយសហព័ទ្ធ ឬ អនីតិសង្វាសជន ត្រូវ ផ្ដន្ទាទោសដាក់ពន្ធនាគារ ពី ២ ឆ្នាំទៅ ៥ ឆ្នាំ និងពិន័យជាប្រាក់ពី ៤ លានរៀលទៅ ១០ លានរៀល កាលបើអំពើហិង្សានោះប្រព្រឹត្តដោយសហព័ទ្ធ ឬអនីតិសង្វាសជនរបស់ជនរងគ្រោះ”។

តារាសម្ដែង អេ ន វីន ត្រូវបានសមត្ថកិច្ច អាវុធហត្ថ ចាប់ខ្លួន បញ្ជូនមក តុលាការ ពាក់ព័ន្ធនឹងអំពើហិង្សាលើកំណាន់ចិត្ត ឈ្មោះ សុទ្ធ កញ្ចកា ដែលជាស្ត្រីមេម៉ាយដោយប្រើខ្សែក្រវាត់។

ដំបូងឡើយពេលសមត្ថកិច្ចបញ្ជូន អេនវីន មកតុលាការ គេកត់សម្គាល់ឃើញមានគូកនរបស់ អេដវីន ច្រើននាក់បានមកយកអាវក្រមាបិទបាំងកុំឲ្យអ្នកកាសែតថតរូបច្បាស់ពេក៕
អត្ថបទ ៖ មករា