សុភ័ក្ត្រ កុសុម៉ា ផ្ដល់៨០០ដុល្លារជួយសម្រេចក្តីស្រមៃយុវជនពិការជើងម្នាក់

ភ្នំពេញ៖ ពិធីការិនីសម្តីចាក់ទឹកមិនលិចកញ្ញា​ សុភ័ក្ត្រ កុសុម៉ា ដោយមើលឃើញ និងការអាណិត​ចំពោះបុរសម្នាក់ដែលមានពិការភាព (ពិការជើង) បានផ្តល់ថវិកាផ្ទាល់ខ្លួនដើម្បីជួយ​សម្រេច​​ក្តីស្រមៃ។

បើតាមការបញ្ជាក់ឱ្យដឹងពីលោក តាន់ គីមសួរ លើ Facebook នៅក្នុងសកម្មភាពចូលរួមក្នុងយុទ្ធនាការលញ់គ្រាប់ថ្នាំដើម្បីបញ្ចុះកម្តៅផែនដី (លញ់ដីបង្កប់គ្រាប់ដើមឈើ ដើម្បីបាចគ្រាប់លញ់ទាំងនោះនៅតំបន់ព្រៃរេចរឹល) នៅថ្ងៃទី២៥ ខែមិថុនានេះ បានបញ្ជាក់ថា ការផ្តល់ថវិកាពីសំណាក់កញ្ញា សុភ័ក្ត្រ កុសុម៉ា នេះដោយសារនាងឃើញ ហើយអាណិត និងដើម្បីជួយបង្កើតមុខរបរសម្រាប់ចិញ្ចឹមជីវិត​បុរសពិការនោះ។ ថវិការបស់ សុភ័ក្រ្ត កុសុម៉ា គឺមានចំនួន៨០០ដុល្លារ។

លោក តាន់ គីមសួរ បានលើកឡើងថា៖ “ប្អូនស្រី សុភ័ក្រ្ត កុសុម៉ា មានសេចក្តីរំភើបចិត្ត​ជាខ្លាំង​ចំពោះទឹកចិត្តរបស់ប្អូនប្រុសពិការជើងម្នាក់នេះ ក៏សម្រេចចិត្តបំពេញក្តីស្រមៃជូនគាត់​ក្នុងការ​បង្កើត​មុខរបរជាជាងជុសជុលគ្រឿងអេឡិចត្រូនិចដោយផ្តល់ថវិកាជូនគាត់ចំនួន៨០០ដុល្លារ”។ 

តាមរយៈទឹកចិត្តដ៏ល្អរបស់តារាស្រីកញ្ញា សុភ័ក្រ្ត កុសុម៉ានេះ គេឃើញមានទស្សនិកជន និងអ្នក​ប្រើប្រាស់បណ្តាញសង្គមជាច្រើនបានសម្តែងការគាំទ្រ និងលើកទឹកចិត្តនាងក្នុងនាមខ្មែរចេះស្រលាញ់ខ្មែរដូចគ្នា៕

អត្ថបទ៖ ចាន់រ៉ា