ជីវិតកម្សាន្ដ

តារាចម្រៀងម៉ាឡេស៊ីដ៏ល្បីម្នាក់ស្លាប់ដោយសារកូវីដក្រោយសម្រាលកូន

បានផុស

៤ years មុន

នៅ

ថ្ងៃអង្គារ ១០ សីហា ២០២១

ដោយ

chean virakbot

តារាចម្រៀងស្រីដ៏ល្បីម្នាក់របស់ប្រទេសម៉ាឡេស៊ីបានស្លាប់ដោយកូវីដ-១៩ ប៉ុន្មានថ្ងៃបន្ទាប់ពីនាងទើបសម្រាលកូនទី៤។

មានផ្ទៃពោះរយៈពេល៨ខែ នាង Siti Sarah Raisuddin ដែលមានកម្រិតអ៊ុកស៊ីសែនខ្សោយត្រូវបានចាក់ឲ្យសន្លប់ដើម្បីធ្វើការវះកាត់យកកូន។ ទារកត្រូវបានជួយសង្គ្រោះឲ្យមានជីវិត ប៉ុន្តែនាងមិនអាចមានឱកាសបីកូនចុងក្រោយបានឡើយ។

ប្តីរបស់តារាចម្រៀងរូបនេះបាននិយាយតាមវីដេអូខលមុនពេលនាងស្លាប់ដោយបង្ហាញឲ្យឃើញនាងស្រក់ទឹកផ្នែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Shuib Sepahtu ជាប្តីនិងជាតារាកំប្លែងម្នាក់បាននិយាយថា ៖«វាហាក់ដូចជានាងយល់ពីអ្វីដែលយើងកំពុងនិយាយជាមួយនាង។ វាប្រេះទ្រូងខ្ញុំហើយដើម្បីផ្តល់ដំណឹងដល់កូនទាំង៣អំពីការស្លាប់របស់ម្តាយ»។

ក្រៅពីទារកទើបកើត ប្តីប្រពន្ធមានកូនបីនាក់ដែលទើបមានអាយុពី៦ឆ្នាំទៅ១០ឆ្នាំ។ តាមព័ត៌មានបានផ្សាយថា គ្រួសារទាំងមូលឆ្លងកូវីដ-១៩ទាំងអស់កាលពីថ្ងៃទី២៥ ខែកក្កដា បន្ទាប់ពីប៉ះពាល់ជាមួយអ្នកជួយក្នុងស្រុក។

ប៉ុន្មានថ្ងៃក្រោយមក នាង Siti Sarah បានបង្ហោះវីដេអូលើតាមគណនី Instagram អំពីកូនៗរបស់នាងយំ បន្ទាប់ពីធ្វើតេស្តរកកូវីដ-១៩ដែលនាងរៀបរាប់ថាពិបាកចិត្តខ្លាំងណាស់។

ដំណឹងពីការស្លាប់របស់នាងបានធ្វើឲ្យអ្នកគាំទ្ររបស់នាង ក៏ដូចជាសង្គមសិល្បៈមានការស្តាយ និងក្រៀមក្រំយ៉ាងខ្លាំង។

សូម្បី ព្រះមហាក្សត្រ និងអគ្គមហេសីរបស់ប្រទេសម៉ាឡេស៊ីក៏បានចូលរួមរំលែកទុក្ខដល់ក្រុមគ្រួសាររបស់នាងដែរ។ បង្ហោះលើ Facebook មួយ ព្រះបរមរាជវាំងបានសរសេរថា ៖«ព្រះមហាក្សត្រ និងអគ្គមហេសីមានការសោកស្តាយ និងចូលរូមរំលែកទុក្ខចំពោះការបាត់បង់តារាចម្រៀងរូបនេះ ហើយសង្ឃឹមក្រុមគ្រួសាររឹងមាំឡើងចំពោះការបាត់បង់មនុស្សជាទីស្រឡាញ់»។

ការស្លាប់របស់តារាចម្រៀង Siti Sarah កើតឡើងចំពេលប្រទេសម៉ាឡេស៊ីកំពុងចាប់ផ្តើមបន្ធូរបន្ថយបំរាមរឹតត្បិតសម្រាប់អ្នកដែលបានចាក់វ៉ាក់សាំងនៅថ្ងៃអង្គារ៍នេះ ខណៈប្រទេសទាំងមូលនៅតែធ្ងន់ធ្ងរដោយកូវីដដដែល។