ពាក្យចចាមអារ៉ាម​ថា ភរិយាលោក Chakrit Yamnarm មិនព្រមយកកូន ទើបកើតរឿងលែងលះ

បន្ទាប់ពីតារាសម្ដែងល្បីឈ្មោះ លោក Chakrit Yamnarm បានលែងលះជាមួយភរិយានាង Woonsen ដែលធ្លាប់រួមរស់នឹងគ្នាអស់ពេល ៥ឆ្នាំ អ្នកគាំទ្រនៅតែមិនទាន់ដឹងមូលហេតុពិតប្រាកដឡើយ ពីក្រោយការបែកបាក់នេះ។

រឿងរ៉ាវលែងលះគ្នារវាងគូស្នេហ៍តារា ថៃ លំដាប់ជួរមុខក្នុងប្រទេសមួយគូនេះ បានធ្វើឱ្យសង្គមសិល្បៈថៃ ក៏ដូចជាមហាជនមានការភ្ញាក់ផ្អើល និងសោកស្ដាយយ៉ាងខ្លាំងចំពោះចំណងអាពាហ៍ពិពាហ៍ពួកគេ ព្រោះកន្លងមកអតីតប្ដីប្រពន្ធពួកគេ ពិតជាស្រឡាញ់គ្នាខ្លាំង និងមានភាពផ្អែមល្ហែមស្ទើរបេះមិនចេញ។

ស្របពេលដែលសាមីខ្លួនទាំងពីរ មិនចេញមុខបញ្ជាក់ហេតុផលពីក្រោយរឿងចែកផ្លូវគ្នា អ្នកគាំទ្របានដាក់ការសង្ស័យថា ការពិតនៃការលែងលះនេះ បណ្ដាលមកពីអតីតភរិយា អ្នកនាង Woonsen មិនព្រមយកកូន ព្រោះខ្លាចខូចរាង។

ក្រោយលេច​ធ្លាយពាក្យចចាមអារ៉ាមបែបនេះ លោក Chakrit Yamnarm នៅតែមិនបានចេញមុខមកបកស្រាយ ហើយក៏មិនបានបដិសេធអ្វីដែរ។ ចំណែកឯតារាស្រី Woonsen វិញ បានចេញមុខបញ្ជាក់ភ្លាមៗថា ការចោទប្រកាន់ទាំងនោះ សុទ្ធតែជារឿងបំភ្លៃ ព្រោះថាការពិតអ្នកនាងក៏ចង់បានកូនតាំងពីអាយុ ៣០ ឆ្នាំមកម្ល៉េះ តែមិនអាចមាន។

មិនថាសាមីខ្លួន ចេញមុខបកស្រាយយ៉ាងនេះក្ដី សាធារណជននៅតែជឿថា ជុំវិញការលែងលះរបស់គូស្នេហ៍នេះ មិនមានមូលហេតុអ្វីក្រៅពីរឿងកូននោះទេ៕

ប្រែសម្រួល៖ សន្យា

ចុចអាន៖ ការពិត ១០យ៉ាង ពី Anchilee Scott-Kemmis បវរកញ្ញាចក្រវាល ថៃ ឆ្នាំ២០២១

ចុចអាន៖ កំពូលតារាថៃ ជាប់ជាស្រីស្អាតលើសគេ និងជាសេដ្ឋីនីមានទ្រព្យសម្បត្តិវាល់លានដុល្លារ ក្នុងវ័យក្មេងខ្ចី