អ្នកគាំទ្ររង់ចាំ Lisa ច្រៀងឆ្លងឆ្នាំនៅថៃ ត្រូវខកចិត្ត

អ្នកនាំពាក្យរបស់ក្រុមហ៊ុន YG Entertainment បានប្រកាសថា តារាចម្រៀងកូរ៉េដើមកំណើតថៃកញ្ញា Lisa Manoban សមាជិកក្រុម Blackpink មិនអាចចូលរួមសម្តែងក្នុងយប់ឆ្លងឆ្នាំ ២០២១ នៅប្រទេសកំណើតរបស់នាងបានទេ។

កាលពីពេលថ្មីៗនេះ ខាងថៃធ្លាប់បង្ហើបថាខ្លួនបានត្រៀមប្រាក់ ១០០ លានបាត (ជាង ៣ លានដុលារអាមេរិក) សម្រាប់អញ្ជើញតារា K-pop កញ្ញា Lisa និងតារាចម្រៀងអ៊ីតាលី លោក Andrea Bocelli ដើម្បីចូលរួមក្នុងការប្រគុំតន្ត្រី Countdown នៅប្រទេសថៃ។ ប៉ុន្តែកាលពីម្សិលមិញនេះ ភ្នាក់ងារកូរ៉េខាងត្បូងបានឆ្លើយតបថា ម្ចាស់បទ Lalisa មិនអាចទៅច្រៀងបានឡើយ។

ដោយឡែក លោក Yuthasak Supasorn អភិបាលនៃមន្ទីរទេសចរណ៍ខេត្តភូកេត និយាយថា ប្រទេសថៃនឹងរៀបចំព្រឹត្តិការណ៍ប្រគុំតន្រ្តី ក្រោមប្រធានបទ “Reopen Thailand: Culture and Tourism Festival” នៅក្នុងតំបន់សាកល្បងទេសចរណ៍ ឬខេត្តតំបន់ពណ៌ខៀវ និងតំបន់ផ្សេងៗទៀត ដែលអនុញ្ញាតដោយរដ្ឋាភិបាល។ ព្រឹត្តិការណ៍​នេះ​នឹង​មានការចូលរួមពី​សិល្បករ​ថៃជាច្រើនរូប ក៏ដូចជាអញ្ជើញតារាបរទេសមកចូលរួមផងដែរ ដើម្បីលើក​ស្ទួយ​វិស័យ​ទេសចរណ៍​ក្នុងស្រុក ក្រោយការបិទខ្ទប់រយៈវែងកន្លងមក។

យ៉ាងណាមិញ ផលិតកម្ម YG បានបញ្ជាក់ តារាចម្រៀង  Lisa មិនអាចបង្ហាញខ្លួននៅក្នុងការប្រគុំតន្ត្រីឆ្លងឆ្នាំ ដែលរៀបចំដោយប្រទេសថៃបានទេ៕

ប្រែសម្រួល៖​ សន្យា

ចុចអាន៖ ការពិត ១០យ៉ាង ពី Anchilee Scott-Kemmis បវរកញ្ញាចក្រវាល ថៃ ឆ្នាំ២០២១

ចុចអាន៖ រឿងរ៉ាវហែកហួររបស់ Kim Seon Ho ផ្អើលអ្នកគាំទ្រ មកពីអតីតមិត្តស្រីជាមនុស្សបែបនេះ