ជីវិតកម្សាន្ដ

ផលិតករ ហ៊ុយ យ៉ាឡេង បង្ហាញក្តីរំភើបខ្លាំងក្រោយក្រសួងប្រកាសបើកដំណើការរោងកុនឡើងវិញ

បានផុស

៣ years មុន

នៅ

ថ្ងៃសុក្រ ២៩ តុលា ២០២១

ដោយ

ផលិតករភាពយន្តល្បីឈ្មោះលោក ហ៊ុយ យ៉ាឡេង បានបង្ហាញអារម្មណ៍រំភើបខ្លាំងបន្ទាប់ពីក្រសួងវប្បធម៌និងវិចិត្រសិល្ប:ប្រកាសឲ្យបើកដំណើរការឡើងវិញរោងភាពយន្តក្នុងរាជធានីភ្នំពេញ។

ផលិតកររឿង «ដើម្បីកូន» លោក ហ៊ុយ យ៉ាឡេង បានសម្តែងនូវអារម្មណ៍រំភើបបែបនេះថា ជយោរោងភាពយន្តបើកហើយ ជាដំបូងខ្ញុំសូមថ្លែងសេចក្តីរីករាយណាស់បងប្អូន។ ខ្ញុំរកអ្វីថ្លែងមិនរួចទេ ដង្ហើមធ្លាប់ដកតឹងៗ ឥឡូវបានធូរហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ កម្ពុជាថ្មី នៅព្រឹកថ្ងៃទី២៩ ខែតុលា ឆ្នាំ២០២១នេះ លោក ហ៊ុយ យ៉ាឡេង បានលើកឡើងថាក្រោយពេលដឹងថា ក្រសួងប្រកាសឲ្យបើករោងកុងឡើងវិញនោះអារម្មណ៍របស់លោកគឺចាប់ផ្តើមធូស្រាលនិងសប្បាយចិត្តខ្លាំងតែម្តងព្រោះថា ភាពយន្តដែលបានផលិតរួចមកនឹងត្រូវបានយកទៅចាក់បញ្ចាំងដើម្បីទទួលបានចំណូលមកវិញ។

លោក ហ៊ុយ យ៉ាឡេង បន្តថា កន្លងមកលោកតែងតែដេកគិតពិបាកចិត្តរឿងបញ្ហានេះដោយមិនដឹងថាពេលណារោងកុនបើកឡើងវិញទេ ព្រោះយើងមានមុខរបរតែមួយដែលត្រូវពឹងលើវិស័យផលិតកុននេះ ហើយដល់ឥឡូវបើកឡើងវិញគឺបានធូចិត្តតែម្តង ពោលគឺប្រៀបបាននឹងមានដង្ហើមផងដែរ។

ជាមួយគ្នានេះដែរលោក ហ៊ុយ យ៉ាងឡេង ក៏បានអំពាវនាវឲ្យមហាជននិងអ្នកគាំទ្រឬអ្នកដែលចូលទស្សនាភាពយន្តក្នុងពេលឆាប់ៗខាងមុខនេះ ត្រូវចូលរូមគោរពឲ្យបានត្រឹមត្រូវតាមការណែនាំរបស់ក្រសួងសុខាភិបាល ពិសេស ៣កុំ ៣ការពារ។

សូមបញ្ជាក់ថា ក្រសួងវប្បធម៌និងវិចិត្រសិល្ប: កាលពីថ្ងៃទី២៨ ខែតុលា ឆ្នាំ២០២១បានប្រកាសបើកដំណើរការឡើងវិញនូវការចូលទស្សនាសារមន្ទីរ រោងភាពយន្ត និងរោងសម្តែងសិល្ប:ក្នុងរាជធានីភ្នំពេញចាប់ពីថ្ងៃទី៣០ ខែតុលា ឆ្នាំ២០២១នេះតទៅ។

យោងតាមសេចក្តីជូនដំណឹងរបស់ក្រសួងបានឲ្យដឹងថា ចំពោះការបើកដំណើរនេះត្រូវគោរពអនុវត្តតាមវិធានការគោលការណ៍ស្តង់ដាប្រតិបត្តិSOPនិងវិធានការនានារបស់ក្រសួងសុខាភិបាលដើម្បីទប់ស្កាត់ការចម្លងរីករាលដាលជំងឺកូវីដ-១៩៕

អត្ថបទ៖ ចាន់រ៉ា