មកដឹងអត្ថន័យឈុតតំណាងជាតិ វៀតណាម ត្រៀមប្រកួតបវរកញ្ញាចក្រវាលឆ្នាំនេះ

ការប្រកួតបវរកញ្ញាចក្រវាលលើកទី ៧០ នឹងប្រព្រឹត្តទៅ នៅ ថ្ងៃទី ១៣ ខែធ្នូ ឆ្នាំ ២០២១ នៅ ទីក្រុង Eilat ប្រទេសអ៊ីស្រាអែល ខណៈដែលបវរកញ្ញាចក្រវាលមកពីបណ្ដាប្រទេសនានាជុំវិញពិភលោកបានត្រៀមរួចរាល់សម្រាប់ការបង្ហាញសមត្ថភាព ទេពកោសល្យ រ៉ូបស្រមោលសរ និងឈុតតំណាងជាតិរៀងៗខ្លួន។

ស្របពេលគ្នាដែរ បវរកញ្ញាចក្រវាលវៀតណាមឆ្នាំ២០២១ កញ្ញា Kim Duyên Nguyen Huynh បានបញ្ចេញឈុតតំណាងជាតិរបស់ខ្លួន និងបានបកស្រាយពីអត្ថន័យនៃឈុតផងដែរ។

ឈុតតំណាងជាតិ វៀតណាម មានឈ្មោះថា “Bánh tét la câm” (Dumb leaf tet cake)។ ​វាជាឈ្មោះនំប្រពៃណីនៃក្រុង Can Tho ដែលជាស្រុកកំណើតរបស់បវរកញ្ញា Kim Duyên ។ នំនេះត្រូវបានដាក់លក់ក្នុងទីក្រុង Can Tho និងតាមច្រាំងនៃទន្លេភាគខាងត្បូងទីក្រុង ហូយអាន។ នៅទីក្រុងទាំងពីរនេះ សម្បូរព្រែកជីក និងផ្សារបណ្តែតទឹក ដែលជាទីកន្លែងទេសចរណ៍ជាតិ និងអន្តរជាតិដ៏ពេញនិយមរបស់ប្រទេស។ នំ “Bánh tét la câm” មានច្រើនរសជាតិ និងច្រើនពណ៌ តែជាទូទៅវាមានពណ៌ស្វាយ ហើយវៀតណាមនិយមធ្វើហូបជុំគ្នា នៅរដូវក្ដៅ។

វៀតណាម ច្នៃឈុតតំណាងជាតិនេះឡើង ក្នុងគោលបំណងផ្សព្វផ្សាយម្ហូបប្រពៃណី និងតំបន់ទេសចរណ៍ផ្សារលិចទឹកនៃទីក្រុង Can Tho និងក្រុង ហូយអាន ខណៈមហាជនសង្ឃឹមថា វាជាឈុតដែលអាចទាក់ទាញពិន្ទុពីគណកម្មការនៃកម្មវិធី Miss Universe ឆ្នាំនេះ៕

ប្រែសម្រួល៖ សន្យា

ចុចអាន៖ ​ឈុតតំណាងជាតិ បវរកញ្ញាចក្រវាល ថៃ មានអត្ថន័យបែបនេះ

ចុចអាន៖ ស្ថាបនិក MGI ចេញមុខឆ្លើយតបជាមួយអ្នកប្ដឹងផ្ដល់បវរកញ្ញា វៀតណាម