តារាល្បី មីយ៉ាន់ម៉ា Paing Takhon កាត់ទោសជាប់ពន្ធនាគារ ៣ឆ្នាំ ក្រោយបាត់ដំណឹងជិត ៧ខែ

តារាល្បីឈ្មោះបំផុតរបស់មីយ៉ាន់ម៉ាលោក Paing Takhon ត្រូវបានកាត់ទោសឱ្យជាប់ពន្ធនាគាររយៈពេល ៣ឆ្នាំ ​​ពីបទការចូលរួមក្នុងការតវ៉ាបាតុកម្មទ្រង់ទ្រាយធំ ដែលបានធ្វើឱ្យកក្រើកប្រទេស បន្ទាប់ពីរដ្ឋប្រហារយោធា កាលពីខែកុម្ភៈ។ នេះបើតាមការចុះផ្សាយដោយសារព័ត៌មាន BBC News នៅថ្ងៃនេះ បន្ទាប់ពីតារាប្រុសរូបនេះបានបាត់ដំណឹងនៅលើប្រព័ន្ធអនឡាញអស់ពេលជិត ៧ខែកន្លងមក។

លោក Paing Takhon ជាតារាបង្ហាញម៉ូដ និងជាតារាសម្តែងដែលមានអ្នកគាំទ្ររាប់លាននាក់ទាំងនៅក្នុងស្រុក និងអន្តរជាតិ កាលពីពេលកន្លងទៅ លោកបានចូលរួមក្នុងការតវ៉ាប្រឆាំងរដ្ឋប្រហារជាមួយពលរដ្ឋមីយ៉ាន់ម៉ា ហើយលោកក៏ធ្លាប់ប្រកាសថ្កោលទោសរដ្ឋាភិបាល តាមបណ្ដាញសង្គមផ្ទាល់ខ្លួនផងដែរ។

មិនបានប៉ុន្មានថ្ងៃ កំលុងខែមេសា ឆ្នាំ២០២១ បន្ទាប់ពីចូលរួមតវ៉ាជាមួយបាតុករ តារាប្រុសវ័យ ២៤ឆ្នាំរូបនេះ ក៏ត្រូវបានចាប់ខ្លួន និងលេចឮដំណឹងថា លោកត្រូវបានរដ្ឋាភិបាលធ្វើទារុណកម្មថែមទៀតផង។ ចាប់តាំងពីមានការចាប់ខ្លួន Paing Takhon ពុំមានដំណឹងអ្វីពាក់ព័ន្ធនឹងសុវត្ថិភាពរបស់លោកនោះទេ សូម្បីបណ្ដាញសង្គមរបស់តារាប្រុសរូបនេះក៏ត្រូវកាត់ផ្ដាច់ទាំងស្រុងផងដែរ។

ទើបតែថ្ងៃទី២៧ ខែធ្នូ ម្សិលមិញនេះ សារព័ត៌មានក្នុងស្រុក បានចុះផ្សាយថា Paing Takhon ត្រូវបានជាប់ចោទពីបទញុះញង់ការធ្វើបាតុកម្មប្រឆាំងរដ្ឋប្រហារ និងត្រូវបានកាត់ទោសឱ្យជាប់ពន្ធនាគាររយៈពេល ៣ឆ្នាំ៕

ប្រែសម្រួល៖ សន្យា

ចុចអាន៖ តួឯកប្រុស Spider-Man ក្លាយជាម្ចាស់ខ្សែភាពយន្តរកចំណូលបាន ១ពាន់លានដុល្លារ រហូតដល់ ៥រឿង

ចុចអាន៖ កងទ័ពមីយ៉ាន់ម៉ា សម្រុកទៅចាប់ខ្លួនតារាល្បី Paing Takhon ទាំងព្រឹកព្រលឹម