ប៊ុន ផាក បង្ហោះពាក្យមួយឃ្លា ក្រោយជួបព្យុះភ្លៀងជាច្រើន

ក្រោយជួបជម្លោះរឿងស្នេហា ជនទី ៣ របស់លោក ប៊ុន ផាក ដែលធ្វើឲ្យផ្អើលពេញបណ្ដាញសង្គមហ្វេសប៊ុករួចមក ស្រាប់តែម្សិលមិញនេះ លោកបានបញ្ចេញពាក្យមួយឃ្លា ធ្វើឲ្យមានការចាប់អារម្មណ៍ពីអ្នកលេងហ្វេសប៊ុក។

សហគ្រិនវ័យក្មេង ប៊ុន ផាក ត្រូវបានគេចាប់អារម្មណ៍ក្រោយពីលោកបានបង្ហោះពាក្យមួយឃ្លា បន្ទាប់ពីជួបរឿងរកាំរកូសស្នេហា ជាមួយគូស្នេហ៍ ម្ចាស់ហាង V Shop Cambodia អ្នកនាង ស៊ាន សុធារី ដែលធ្វើឲ្យលោកក្លាយជាជនទី ៣ និងត្រូវបានចូលខ្លួនទៅដោះស្រាយបញ្ហានៅតុលាការ ជុំវិញរឿងទាំងនោះផងដែរ។ ដោយឡែកកាលពីម្សិលមិញនេះ លោកបានបង្ហោះនៅលើហ្វេសប៊ុកផ្ទាល់ខ្លួនថា “ធ្លាប់ជួបការប្រមាថ ទើបដឹងពីតម្លៃនៃពាក្យកោតសរសើរ” ដែលធ្វើឲ្យអ្នកលេងបណ្ដាញសង្គមហ្វេសប៊ុកជាច្រើន ចូលខមិន និងស៊ែរ ក្នុងនោះមានទាំងពាក្យលើកទឹកចិត្ត និងពាក្យសើចចំអក។ ទោះជាយ៉ាងណាលោក ក៏មិនបានតបតអ្វី ចំពោះខមិនទាំងនោះដែរ។

គួររំលឹកថា ក្រោយជួបព្យុះភ្លៀងស្នេហានិងបញ្ហាជាច្រើនមក កាលពីខួបស្នេហ៍រយៈពេល ៥ ខែ លោកក៏បានស៊ុបប្រាយ នៅសំបុត្រស្នេហាដ៏ផ្អែមល្អែមទៅកាន់គូស្នេហ៍ អមជាមួយស្នាមក្រែម និងពាក្យពេចន៍ ធ្វើឲ្យមានការច្រណែនពីមនុស្សជាច្រើន បើទោះបីថា ស្នេហាអ្នកទាំងពីរជួប​ឧបសគ្គ​យ៉ាងណាក៏ដោយ៕

អត្ថបទ៖ ផានិត