ចំណង​ស្នេហ៍ខុស​វ័យរវាង​ ឃ្មឹប​ និងប្តីក្រោយ​ត្រូវ​បាន​បញ្ចប់ ​ក្រោម​ហេតុផល​ការ​ប្រើ​ហិង្សា

ទីបំផុតចំណងស្នេហ៍ខុសវ័យរវាងអតីតតារាកំប្លែងអ្នកនាង រ៉េន សុធារី ហៅ ឃ្មឹប ត្រូវបានបែកបាក់គ្នាហើយ បន្ទាប់ពីរួមរស់ជាមួយគ្នាជាប្តី-ប្រពន្ធអស់រយ:ពេលជាង២ឆ្នាំ។

ការបញ្ចប់ចំណងស្នេហាដែលធ្លាប់តែផ្អែមល្ហែម និងល្អូកល្អើននឹងគ្នានេះត្រូវបានអ្នកនាងឃ្មឹប ប្រាប់ឱ្យដឹងថា ដោយ​សារតែប្តីក្មេងរូបនេះបានប្រើអំពើរហិង្សាវាយដំមកលើខ្លួនទាំងកំរោលបណ្តាលឲ្យមានរបួស និងស្នាក់ស្នាមនៅកន្លងមួយចំនួននៃរាងកាយនាង។

អតីតតារាកំប្លែង ឃ្មឹប បានបន្តថា បន្ទាប់ប្រើហិង្សា លើនាងរួចហើយប្តីក្មេងរូបនេះបានលួចយករបស់សំខាន់មួយចំនួនដូចជា សៀវភៅគ្រួសារប័ណ្ណសមាគមសិល្បៈ និងប័ណ្ណក្រីក្រទៅជាមួយផងដែរ។

នាងថាស្វាមីក្រោយរបស់អ្នកនាងឈ្មោះ វណ្ណា វណ្ណី បានប្រើអំពើហិង្សាមកលើរូបនាងព្រោះបញ្ហាបន្តិចបន្តូចដោយកាលនោះស្វាមីចង់ទៅផ្ទះប្អូនតែអ្នកនាងអត់ចង់ទៅព្រោះគ្មានលុយធ្វើសោហ៊ុយ ក៏បង្កជារឿងហិង្សាបង្កស្លាកស្នាមតែម្តង។

អ្នកនាង ឃ្មឹប បានបញ្ជាក់បន្ថែមថា ក្រោយកើតរឿងរ៉ាវនេះអ្នកនាងក៏បានទៅដាក់ពាក្យបណ្តឹងនៅខណ្ឌឫស្សីកែវរួចហើយព្រមទាំងសម្រេចចិត្តថា បែកបាក់គ្នានឹងស្វាមីវ័យក្មេងរូបនេះចាប់ពីពេលនេះតទៅ។

គេកត់សម្គាល់ថា នាអំឡុងពេលប៉ុន្មានឆ្នាំចុងក្រោយនេះ អតីតតារាកំប្លែងអ្នកនាងនាង ឃ្មឹប បានជួបនូវរឿងរ៉ាវព្យុះភ្លៀងជាច្រើនក្នុងជីវិតរបស់នាងស្ទើរតែនឹកស្មានមិនដល់ឡើយ៕

អត្ថបទ៖ ចាន់រ៉ា