អតីតបវរកញ្ញាចក្រវាលអាមេរិក លោតសម្លាប់ខ្លួនពីលើ ខុនដូ

អតីតម្ចាស់ជយលាភីបវរកញ្ញាចក្រវាលសហរដ្ឋអាមេរិកឆ្នាំ២០១៩ នាង Cheslie Kryst បានទទួលមរណភាពក្នុងវ័យ៣០ឆ្នាំ ដោយធ្លាក់ពីខុនដូនៅ Manhattan។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រួសាររបស់ Kryst បានបញ្ជាក់ពីការស្លាប់របស់នាង នៅក្នុងសេចក្តីថ្លែងការណ៍កាលពីថ្ងៃអាទិត្យ។ សាកសពរបស់នាងត្រូវបានគេឃើញនៅលើចិញ្ចើមផ្លូវ ខាងក្រៅខុនដូ Orion ក្នុងទីក្រុង Midtown នៅម៉ោងជាង៧ព្រឹក។

យោងតាមកាសែត New York Post បានឲ្យដឹងថា Kryst រស់នៅជាន់ទី៩នៃខុនដូនេះ។ នាង​ត្រូវ​បាន​គេ​ឃើញ​លើក​ចុង​ក្រោយ​នៅ​​កម្ពស់២៩ជាន់។

ទោះបីជាក្រុមគ្រួសាររបស់នាងមិនផ្តល់មូលហេតុ នៃការស្លាប់ក៏ដោយ ប៉ុន្តែប្រភពពីនាយកដ្ឋានប៉ូលិសក្រុងញូវយ៉កបានបញ្ជាក់ថា Kryst ស្លាប់ដោយការធ្វើអត្តឃាត។

កាសែតដដែល​រាយការណ៍​ថា Kryst បាន​បន្សល់​ទុកកំណត់ហេតុ​មួយ ​ដែលប្រគល់​ទ្រព្យ​សម្បត្តិ​របស់​ខ្លួនទៅ​ឲ្យម្តាយ។

Kryst បានចាប់ផ្តើមប្រកួតបវរកញ្ញាតាំងពីនៅក្មេងជំទង់ ដោយដើរតាមគន្លងម្តាយ ដែលគ្រងមកុដបវរកញ្ញា North Carolina សហរដ្ឋអាមេរិកក្នុងឆ្នាំ២០០២។ Kryst ក៏បានគ្រងមកុដបវរកញ្ញានេះដែរក្នុងឆ្នាំ២០១៩។

នៅអាយុ២៨ឆ្នាំ Kryst បានក្លាយជាស្ត្រីមានអាយុច្រើនជាងគេ ដែលគ្រងមកុដបវរកញ្ញាសហរដ្ឋអាមេរិក។ នាងក៏បានបន្តក្លាយជាអ្នកឈ្នះមកុដនេះយូរជាងគេផងដែរ ដោយសារការពន្យារពេលដែលបណ្តាលមកពីជំងឺរាតត្បាតកូវីដ១៩ ដោយកាន់តំណែងនេះបានរយៈពេល៥៥៧ថ្ងៃ៕

ប្រែសម្រួល៖ Vann Vann

ប្រភព៖ Daily Beast

ចុចអាន៖ បវរកញ្ញា ងិន ម៉ារ៉ាឌី ទម្លាយក្តីស្រមៃធំ និងគន្លឹះជោគជ័យ