ឪពុកអតីតបវរកញ្ញាអាមេរិក ចេញមុខប្រាប់មូលហេតុពីក្រោយការធ្វើអត្តឃាតរបស់កូនស្រី

ដំណឹងនៃការស្លាប់របស់អតីតបវរកញ្ញាចក្រវាលសហរដ្ឋអាមេរិក ឆ្នាំ២០១៩ ​កញ្ញា Cheslie Kryst ដែលបានធ្វើអត្តឃាតដោយលោតពីលើអគារកម្ពស់ ២៩ជាន់ បានបង្កការភ្ញាក់ផ្អើលដល់មហាជនជាខ្លាំង ខណៈគ្រប់គ្នាកំពុងចង់ដឹងពីមូលហេតុពិតដែលនាំបវរកញ្ញារូបនេះហ៊ានបញ្ចប់ជីវិតខ្លួនឯង។

បន្ទាប់ពីមរណភាពភ្លាមៗ ក្រុមគ្រួសារ Cheslie Kryst មិនបានធ្វើសេចក្ដីអត្ថាធិប្បាយអ្វីឡើយ ជាពិសេសពាក់ព័ន្ធនឹងមូលហេតុនៅពីក្រោយការសម្លាប់ខ្លួនរបស់នាង។ ទើបតែពេលនេះ ឪពុក​របស់​ជនរងគ្រោះ ​បានចេញមុខនិយាយថា នាងប្រហែល​ជារងជំងឺ​ធ្លាក់​ទឹក​ចិត្ត​ដោយ​សារ​បញ្ហា​ក្នុង​គ្រួសារ ព្រោះលោកនិងភរិយាបានលែងលះគ្នា តាំងពីកូនៗនៅក្មេង។

លោក Rodney Kryst បានប្រាប់សារព័ត៌មាន New York Post បន្ថែមថា កូនស្រីរបស់លោកមិនបានប្រើប្រាស់ថ្នាំញៀន ឬប្រើគ្រឿងស្រវឹងជ្រុល រហូតដល់ភ្លេចស្មារតី ហើយហ៊ានលោតពីលើអគារដ៏ខ្ពស់នោះទេ។ ការធ្វើអត្តឃាតនេះ ទំនងជានាងមានសម្ពាធខ្លាំងពីគ្រួសារ គ្រាន់តែកន្លងមកនាងមិននិយាយប៉ុណ្ណោះ។

មកទល់ពេលនេះ ការស្លាប់របស់ Cheslie Kryst នៅតែជាប្រធានបទក្ដៅលើបណ្ដាញសង្គម ជាពិសេសក្នុងវិស័យសម្រស់។ ដោយសារកន្លងមក នាងជាមនុស្សដែលតែងយកចិត្តទុកដាក់ ស្រឡាញ់ និងជួយអ្នកដទៃ ទើបក្រោយមរណភាពរបស់ Cheslie Kryst បានបង្កក្ដីសោកស្ដាយដក់ជាប់ក្នុងចិត្តអ្នកស្គាល់នាងគ្រប់គ្នា៕

ប្រែសម្រួល៖ សន្យា

ចុចអាន៖ បង្ហើបមូលហេតុដែលអតីតបវរកញ្ញាអាមេរិក លោតសម្លាប់ខ្លួន កាលពីព្រឹកមិញ