ស្វែង​យល់​ពី​របាំខ្មែរ​ ៣ ប្រភេទ​ ផ្សារភ្ជាប់​ទំនៀម​ទម្លាប់​ប្រពៃណី​ខ្មែរ​

១. របាំ”ឆៃយ៉ាំភូមិខ្ញុំ” គឺជាការឆ្លុះបញ្ចាំង និងបង្ហាញសេចក្ដីសប្បាយរីករាយរបស់យុវជន យុវនារីខ្មែរ ក្នុងពិធីបុណ្យទានតាមបែបប្រពៃណីខ្មែរ។

របាំនេះគឺមានលក្ខណៈកំប្លុកកំប្លែងក្រមាច់ គួឱ្យសើចតាមបែបមហាជនស្រុកស្រែចម្ការ ហើយជាប្រភេទរបាំប្រពៃណីបែបប្រជាប្រិយ៍ ដែលបានផ្សារភ្ជាប់ពីទំនៀមទម្លាប់ប្រពៃណីរបស់ខ្មែរតាំងពីបុរាណកាល។ នាសម័យកាលនោះ ស្គរឆៃយ៉ាំ គឺជាស្គរជ័យដែលប្រើសម្រាប់ហែរក្បួនទ័ព បន្ទាប់ពីទទួលបានជ័យជំនះត្រឡប់ចូលនគរវិញ។

២. របាំកៃលាស់

របាំកៃលាស់ គឺជាប្រភេទរបាំបុរាណខ្មែរ និងជានិម្មិតរូបនៃភាពបរិសុទ្ធខាងផ្លូវចិត្តគំនិត។ តាមរយៈរបាំនេះសិល្បករ រេរាំថ្វាត់ថ្វាយកត្តញ្ញូតាធម៌ចំពោះទេវតា និងពាំនាំមកវិញនូវមេត្តាធម៌ចំពោះមនុស្សលោក និងជាប្រភេទរបាំទេវៈខ្មែរ ដែលជាកំពូលអរិយធម៌នាសម័យអង្គរដ៍រុងរឿង។

៣. របាំសហសម័យខ្មែរ «យុវវ័យ និងក្ដីសង្ឃឹម»

របាំសហសម័យខ្មែរ «យុវវ័យ និងក្ដីសង្ឃឹម» គឺជារបាំមួយបង្ហាញអំពីការរួបរួមសាមគ្គីរបស់យុវជនដូចជាការជិះលើទូកតែមួយ ជាធ្លុងមួយដែលមានកម្លាំងថាមពលរួមដើម្បីឆ្ពោះទៅមុខទាំងអស់គ្នា។ យុវជនគឺជាទំពាំងស្នងឬស្សី! យុវជនគឺជាកម្លាំងបន្តវេន ដ៍រឹងមាំប្រកបដោយសក្ដានុពលមិនចេះរីងស្ងួត៕