តារាល្បីៗស្ទើរគ្រប់វិស័យលើលោក សុទ្ធតែចង់ឲ្យសង្គ្រាម រុស្ស៊ី-អ៊ុយក្រែន បញ្ចប់

ព្រឹត្តិការណ៍​ដែល​មនុស្ស​ជុំវិញ​ពិភពលោក កំពុងតាមដានច្រើន​ជាង​គេ គឺ​ចៀស​មិនរួច​ពីសង្គ្រាម ​រុស្ស៊ី-អ៊ុយក្រែន ដោយបានកើតឡើង នាថ្ងៃទី ២៤ ខែកុម្ភៈ ឆ្នាំ ២០២២ ។

ទន្ទឹម​នឹង​នោះ​​​ ក្នុង​ហេតុការណ៍​នេះ​ដែរ​ តារា​ល្បីៗ​ទាំង​អស់​គ្នា​ ក៏​មិន​អាច​ព្រងើយ​កន្តើយ ​ដោយ​នាំ​គ្នា​បញ្ចេញ​យោបល់ និង​ប្រកាស​ជំហរ​ផ្ទាល់​ខ្លួន ​ចំពោះ​សង្គ្រាម​រុស្ស៊ី-អ៊ុយក្រែន​ផង​ដែរ។

១ Cardi B

តារា​រ៉េប​អាមេរិក Cardi B បាន​បង្ហោះ​ខ្លឹមសាររបស់នាង លើ​គណនី Twitter ពីបញ្ហា​រុស្ស៊ី-អ៊ុយក្រែនថា “ខ្ញុំសង្ឃឹមថា មេដឹកនាំនៅ​ក្នុង​ពិភពលោក​នេះ​ នឹង​ឈប់​បំពាន​អំណាច​របស់​ពួកគេ ហើយគិត​ឲ្យ​បានហ្មត់ចត់អំពីអ្វីដែលមនុស្សរង ផលប៉ះពាល់ វាមិនមែនគ្រាន់​តែ​គិត​ថា ​ពិភពលោក​មាន​គ្រោះថ្នាក់​នៃ​សង្គ្រាម ការដាក់ទណ្ឌកម្ម ការឈ្លានពាននោះទេ រឿងទាំងនេះ​គួរ​តែ​ជា​ជម្រើស​ចុងក្រោយ។ មេដឹកនាំ​គួរ​មាន​ការ​ព្រួយ​បារម្ភ “។

២ Miley Cyrus

តារា​ចម្រៀង​អាមេរិក​វ័យ​ក្មេង​ម្នាក់​ទៀតគឺ Miley Cyrus​ បានបង្ហោះនៅលើ Instagram ថា “ខ្ញុំភ្ញាក់ពីដំណេកព្រឹកនេះ ហើយមានការ​សោកស្ដាយ​ជា​ខ្លាំ ង​ដែល​បាន​ទទួល​ដំណឹង​ថា អ៊ុយក្រែនឈ្លានពាន។ ខ្ញុំបានថតនៅទីក្រុង Kiev សម្រាប់រឿង Nothing Breaks Like A Heart ហើយ​វា​ជា​បទពិសោធន៍​ដ៏​អស្ចារ្យមួយ។ ខ្ញុំនឹងដឹងគុណ​ជានិច្ច​ចំពោះ​ប្រជាជន​ក្នុង​សហគមន៍​ សម្រាប់ការស្វាគមន៍យ៉ាងកក់ក្តៅរបស់ពួកគេ។ យ៉ាងហោច​ណាស់ ពលរដ្ឋ​អ៊ុយក្រែន ៤០នាក់ ត្រូវបានរាយការណ៍ថាបានស្លាប់។ ប្រសិន​បើ​ជម្លោះ​នេះ​នៅ​តែ​បន្ត ត្រូវតែមានការខាតបង់កើនឡើង ហើយ​នឹង​មាន​មនុស្ស​ជា​ច្រើន​ត្រូវ​បាន​បង្ខំ​​​ឲ្យ​ចាក​ចេញ​ពី​ផ្ទះ​សម្បែង និង​ជម្លៀស​ចេញ “។ ខ្ញុំ​ឈរ​ជា​មួយ​អ្នក​រាល់​គ្នា​ នៅ​អ៊ុយក្រែន​ដែល​រង​ផល​ប៉ះ​ពាល់​ដោយ​សមរភូមិ​នេះ ហើយ​ខ្ញុំ​សង្ឃឹម​ថា ​ប្រជាជន​នៃ​ពិភពលោក នឹង​ជួយ​យើង​ទាមទារ​ឲ្យ​សង្គ្រាម​នេះ​បញ្ចប់​ ឲ្យ​បាន​ឆាប់​ តាម​ដែល​អាច​ធ្វើ​ទៅ​បាន”។

៣ Ariana Grande

តារា​ចម្រៀង​ស្រី​រាង​តូច​ច្រឡឹង Ariana Grande ក៏ជា​បុគ្គល​ម្នាក់​ ដែល​ចេញ​មក​បង្ហាញ​ជំហរ​ក្នុង សង្គ្រាម​រុស្ស៊ី – អ៊ុយក្រែន តាមរយៈ Instagram ផ្ទាល់ខ្លួន ថា “យើង​នឹង​ឈរ​ជាមួយ​ប្រជាជន និង​ក្រុម​គ្រួសារ​ក្នុង​ប្រទេស​អ៊ុយក្រែន ដែល​រង​ផល​ប៉ះពាល់​ដោយ​ការ​វាយ​ប្រហារ​របស់​រុស្ស៊ី”។

៤ David Beckham

ឪពុក​កូន៤រូបនេះ ក៏​បាន​បង្ហោះ​រូបថតមួយចំនួន នៃឧប្បត្តិហេតុ​ដែល​កើតឡើងនៅ​ប្រទេស​អ៊ុយក្រែន​​លើ Instagram ផ្ទាល់ខ្លួនថា “ស្ថានភាព​នៅ​អ៊ុយក្រែន​ពេល​នេះ​ គឺ​ជា​ការ​បំផ្លិចបំផ្លាញ និង​គួរ​ឲ្យ​ភ័យ​ខ្លាច​សម្រាប់​ប្រជាជន និងដូចឪពុកម្តាយផ្សេងទៀត។ វាធ្វើ​ឲ្យ​ខ្ញុំ​ខូចចិត្ត​ នៅ​ពេល​ឃើញផលប៉ះពាល់ដែលវាមានលើកុមារស្លូតត្រង់ ​ដែល​រស់នៅ​ក្នុង​តំបន់​សង្គ្រាម។ នៅពេល​ដែល​ជម្លោះ​កាន់​តែ​កើនឡើង កុមារកាន់តែច្រើនកំពុងត្រូវការជំនួយ” ។

៥ Rachel Brosnahan និង Elle Fanning

តារា​សម្ដែង​ជនជាតិ​អាមេរិក​ពីររូបនេះ ក៏បាន​បង្ហោះ​លើ​ Instagram ថា “យើងកំពុងរងទុក្ខច្រើន។ យើង​បាន​បាត់​បង់​មនុស្ស​ជា​ច្រើន​ក្នុង​សង្គ្រាម ទុរ្ភិក្ស និង​ព្រឹត្តិការណ៍​ប្រវត្តិសាស្ត្រ។ ប្រជាជន​អ៊ុយក្រែន​ជិត ៧ លាននាក់ ត្រូវបានសម្លាប់នៅក្នុងសង្គ្រាមលោកលើកទីពីរ។ វាជាចំនួន​ដែល​ច្រើនជាង​ប្រទេស​ដទៃ។ យើង​មិន​ត្រូវការ​ច្រើន​ទេ។ យើងមិនមែនជា​ចក្រពត្តិនិយម​ទេ។ យើង​មិន​ចូលចិត្ត​សង្គ្រាម​ទេ។ ដី​របស់​យើង​គ្រប​ដណ្ដប់​ដោយ​ដី​ខ្មៅ ធ្វើ​ស្រែ​ចម្ការ​តាម​ចិត្ត។ យើង​គ្រាន់​តែ​ចង់​បាន​សន្តិភាព” ៕

ប្រែសម្រួល៖ សាង ស្រីល័ក្ខ

ប្រភព៖ CNN

ចុចអាន៖ខ្សែជីវិតដំបូង លោក Yoon Suk-yeol មុនក្លាយជាប្រធានាធិបតីជាប់ឆ្នោត របស់កូរ៉េខាងត្បូង