បុណ្យភូមិ មកវិញហើយ គ្រោងមាន ២ លើក

ភ្នំពេញ៖ កម្មវិធីបុណ្យភូមិ តែងតែរៀបចំឡើង នាដើមខែមេសា ជារៀងរាល់ឆ្នាំ នៅតាមទីវត្តអារាម ដែលរៀបចំដោយក្រុមស្ថាបនិកលើកស្ទួយសិល្បៈវប្បធម៌ ដើម្បីអបអរពិធីបុណ្យចូលឆ្នាំថ្មី ប្រពៃណីខ្មែរ នាពាក់កណ្តាលខែមេសា។

បន្ទាប់ពីអាកខាន ២ ឆ្នាំដោយសារការរាតត្បាតនៃជំងឺកូវីដ-១៩ ក្នុងឆ្នាំ ២០២២ នេះ បុណ្យភូមិ នឹងវិលត្រឡប់មកវិញ។ នេះបើយោងតាមលើទំព័រហ្វេសប៊ុកផ្លូវការរបស់បុណ្យភូមិ នៅថ្ងៃទី២៥ ខែមីនានេះ។

ទំព័រហ្វេសប៊ុក បានប្រកាសថា៖ “បុណ្យភូមិ មកវិញហេីយ” អត់ម៉េចបាន បុណ្យភូមិឆ្នាំហ្នឹង!។ តែថាឆ្នាំនេះមកបែបប្លែក មានសប្តាហ៍ទី១ ហេីយសប្តាហ៍ទី២ ទៀត។ ជួបគ្នាឆាប់ៗនេះណា នៅថ្ងៃទី១ ២ ៣ និងថ្ងៃទី៨ ៩ ១០ ខែមេសា ខាងមុខនេះ។ ចំពោះទីតាំង នឹងប្រកាសនៅចុងសប្តាហ៍នេះ។

ពាក់ព័ន្ធការរៀបចំកម្មវិធីបុណ្យនេះ “កម្ពុជាថ្មី” បានទាក់ទងដើម្បីសួរនាំព័ត៌មានបន្ថែម ប៉ុន្តែមិនទាន់មានការឆ្លើយតបនៅឡើយ។

គួរបញ្ជាក់ថា បុណ្យភូមិជាកម្មវិធីបែបប្រពៃណីមួយ ដែលធ្វើឡើងជារៀងរាល់ឆ្នាំ ដែលប្រមូលផ្តុំ និងគាស់រម្លើងឡើងវិញនូវទម្រង់សិល្បៈ ទំនៀមទម្លាប់ ប្រពៃណី ពិធីសាសនា ការជួបជុំរបស់ជនជាតិខ្មែរ ក្នុងកំឡុងពេលចូលឆ្នាំប្រពៃណីជាតិ អមជាមួយនឹងល្បែងប្រជាប្រិយ ការរាំលេងកម្សាន្តជាមួយចង្វាក់ប្រពៃណីខ្មែរជាច្រើន មានការបង្ហាញ និងលក់ម្ហូបអាហារ ផលិតផល និងស្នាដៃរបស់ប្រជាពលរដ្ឋខ្មែរ៕

អត្ថបទ៖ ចាន់រ៉ា