Will Smith ហាមមិនឲ្យចូលក្នុងកម្មវិធីប្រគល់ពានរង្វាន់ Oscar រយៈពេល ១០ ឆ្នាំ ក្រោយទះកំផ្លៀង Chris Rock

តារាសម្តែងហូលីវូដ Will Smith ត្រូវបានហាមប្រាមមិនឲ្យចូលរួមក្នុងកម្មវិធី Oscar ក្រោយៗទៀតរយៈពេល ១០ ឆ្នាំ បន្ទាប់ពីទះកំផ្លៀងតារាកំប្លែង Chris Rock នៅលើឆាកក្នុងកម្មវិធីប្រគល់ពានរង្វាន់ Academy Awards លើកទី ៩៤ ។

បើតាមបណ្ឌិត្យសភាចលនាសិល្បៈ និងវិទ្យាសាស្ត្រ (The Academy of Motion Picture & and Sciences) បានឲ្យដឹងថា ការសម្រេចចិត្តហាមឃាត់លោក Smith កើតឡើង បន្ទាប់ពីក្រុមប្រឹក្សាភិបាលនៃបណ្ឌិតសភាបានកោះប្រជុំដើម្បីពិភាក្សាអំពីការឆ្លើយតបរបស់ខ្លួន ។

បន្ថែមពីលើការហាមប្រាមពីពានរង្វាន់ Oscar, លោក Smith ក៏ត្រូវបានហាមឃាត់មិនឲ្យចូលរួមក្នុងព្រឹត្តិការណ៍ Academy ណាមួយក្នុងអំឡុងពេលនោះផងដែរ ។

ប្រធានបណ្ឌិត្យសភាលោក David Rubin និងនាយកប្រតិបត្តិ Dawn Hudson បានលើកឡើងពី “អាកប្បកិរិយាមិនអាចទទួលយកបាន និងបង្កគ្រោះថ្នាក់” របស់ Smith ក្នុងអំឡុងព្រឹត្តិការណ៍ថ្ងៃទី ២៧ ខែមីនា នៅក្នុងសំបុត្របើកចំហទៅកាន់សមាជិក Academy ។

ទន្ទឹមនោះ Smith ក៏បានប្រកាសលាលែងចេញពី Academy កាលពីសប្តាហ៍មុនផងដែរ ចំពេលមានការរិះគន់យ៉ាងខ្លាំងចំពោះការទះកំផ្លៀងទៅលើតារាកំប្លែង Chris Rock ដោយសារតែនិយាយប៉ះពាល់ប្រព័ន្ធរបស់លោក ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ Will Smith ឈប់សម្ដែងឲ្យហូលីវូដ ក្រោយរឿងអាស្រូវទះកំផ្លៀង Chris Rock