មុនក្លាយជាកំពូលតារាចម្រៀងប្រចាំប្រទេស តើ ព្រាប សុវត្ថិ មានខ្សែជីវិតដូចម្ដេចខ្លះ?

ប្រឡូកក្នុងវិស័យសិល្បៈជិត ៣០ ឆ្នាំ កំពូលតារាចម្រៀងប្រចាំប្រទេស លោក ព្រាប សុវត្ថិ បានឆ្លងកាត់ឧបសគ្គអ្វីខ្លះ នឹងមានជីវិតយ៉ាងដូចម្ដេចទម្រាំមានថ្ងៃនេះ។

ព្រាប សុវត្ថិ កើត​នៅ​ថ្ងៃទី​ ២៥ ខែឧសភា ឆ្នាំ ១៩៧៥ កំឡុង​ពេលដែល​កងទ័ព ខ្មែរក្រហម ធ្វើការ​ជម្លៀស​ប្រជាពលរដ្ឋ​ចេញពី​ទីក្រុង​ភ្នំពេញ នា​ថ្ងៃទី​ ១៧ ខែមេសា ឆ្នាំ ១៩៧៥។ ក្រោយបញ្ចប់​ការសិក្សា​នៅ​វិទ្យាល័យ​ក្នុង​ឆ្នាំ ១៩៩១ លោកក៏បន្ត​ការសិក្សា​បរិញ្ញាបត្រ​ច្បាប់​ និង​សេដ្ឋកិច្ច​ នៅ​សកល​វិទ្យាល័យ​សេដ្ឋកិច្ច ក្នុងអំឡុង​ពេលនោះ​ លោក​បានដាក់​ពាក្យ​បម្រើកងទ័ព។ ក្នុង​ឆ្នាំ ១៩៩២ លោក​បាន​ចូលធ្វើ​ទាហាន នៅ​អគ្គស្នងការ​នយោបាយ ព្រាប សុវត្ថិ ឧស្សាហ៍ឡើង​ច្រៀង​ក្នុង​កម្ម​វិធី​ជប់លៀងផ្សេងៗ។ ដោយសារសំឡេងមានទឹកដម លោកក៏ត្រូវបាន​មិត្ត​ភ​ក្ដិនែ​នាំឲ្យទៅ​ចេញ​ច្រៀង​តាម​រង្គសាល និងតាម​បារ​ប៊ី​ហ្គា​ដេ​ន។ ក្នុង​ឆ្នាំ ១៩៩៤ លោក​ដើរ​ច្រៀង​តាម​ភោជនដ្ឋាន​ផ្សេងៗជាច្រើន ​បាន​​តែ ១​ ឆ្នាំ លោក​ក៏បាន​ទៅ​ច្រៀង​ឲ្យ​ផលិតកម្ម រស្មី​ហង្ស​មាស ក្នុង​ឆ្នាំ ១៩៩៥ ពេលនោះ​ហើយ​ ដែលលោកបាន​បោះ​ជំហាន​ឈាន​ចូល​ក្នុង​វិស័យ​សិ​ល្បៈ​យ៉ាង​ពេញ​លេញជា​លើកដំបូង និងបានចេញ​បទ​ចម្រៀង​ជា​លើកដំបូង “​អូន​ជា​បេះដូង​បង​” ។

ក្នុងអំឡុង​ឆ្នាំ ១៩៩៥ ព្រាប សុវត្ថិ បាន​ចូល​ច្រៀង​ក្នុង ផលិតកម្ម រស្មី​ហង្ស​មាស និង​បានចេញ​បទ​ចម្រៀង​ជា​លើកដំបូង​របស់ខ្លួន​ចំនួន ​២ ​បទ ដែលមាន​ចំណងជើង​ថា “​ចាំ​អូន​មួយជីវិត​” និង​បទ “​អូន​ជា​បេះដូង​បង​” ការបង្ហាញ​ខ្លួន​របស់ ព្រាប សុវត្ថិ ក្នុង​បទ​ចម្រៀង​លើកដំបូង​ពេលនោះ​មិនទាន់​ទទួលបានការពេញនិយម​ស្ដាប់​ច្រើន​នោះទេ ត្បិត​ពេលនោះ ព្រាប សុវត្ថិ ត្រូវ​ប្រកួតប្រជែង​ជាមួយ​តារាចម្រៀង​ជួរមុខ និង​តារាចម្រៀង​រាមច្បង​ជាច្រើន​ទៀត ក្នុង​ផលិតកម្ម​ដូចគ្នា។ ព្រាប សុវត្ថិ បាន​បន្ត​ច្រៀង​ក្នុង​ផលិតកម្ម រស្មី​ហង្ស​មាស ពី​ឆ្នាំ ១៩៩៥ ដល់​ឆ្នាំ ១៩៩៧ ជាមួយ​តារាចម្រៀង​ជាច្រើន​ដូចជា​៖ លោក សុះ ម៉ាច និង អ្នកស្រី សួន ចន្ថា ក្នុង​អាល់​ប៊ុ​មរ​ស្មី​ហង្ស​មាស និង កញ្ញា ទូច ស៊ុន​និ​ច ។ ក្នុង​ឆ្នាំ ១៩៩៨-១៩៩៩ ព្រាប សុវត្ថិ បាន​ចាប់​ដៃគូ​ជាមួយ​អ្នកស្រី ហ៊ឹម ស៊ី​វន និង អ្នកស្រី សួន ចន្ថា ​រួមគ្នាក្នុង​អាល់​ប៊ុ​មរ​ស្មី​ហង្ស​មាស​ឆ្លងឆ្លើយ ​ហើយមាន​ការពេញនិយម​ស្ដាប់​ជាច្រើន​ផងដែរ។ លោក ព្រាប សុវត្ថិ ក៏បានរៀប​អាពាហ៍ពិពាហ៍​ នៅឆ្នាំ ១៩៩៧ និង​មាន​ចំណងដៃ​កូនប្រុស​ចំនួន​ ៣ ​នាក់​។

ក្នុងអំឡុង​ឆ្នាំ ២០០០ លោក ព្រាប សុវត្ថិ បានចេញ​នូវ​បទ​ចម្រៀង រាំវង់ ដើម្បី​ចូលរួម​អបអរ ពិធីបុណ្យ​ចូលឆ្នាំ​ខ្មែរ ក្នុងនោះ​មាន​បទ “​រាំវង់​សហស្ស​វត្សរ៍​ថ្មី​” និង​អាល់​ប៊ុ​ម​ដៃគូ ជាមួយ​អ្នកស្រី ហ៊ឹ​ម ស៊ី​វន បទ​ចម្រៀងដែល​ធ្វើឱ្យ​លោក ព្រាប សុវត្ថិ កាន់​តែមាន​ភាពល្បីល្បាញ​ក្នុងពេលនោះ​គឺ​បទ “​មាន​ថ្មី​ម្ដេច​មិន​ប្រាប់​” ចេញ​ក្នុង​អាល់​ប៊ុ​ម​ទោល ក្លាយជា​បទ​ចម្រៀង​ដែលមានការ​ចាក់​ស្ដាប់​ច្រើន​បំ​ផុត​ក្នុងប្រទេស​កម្ពុជា។ ក្នុងអំឡុង​ឆ្នាំ ២០០១ លោក ព្រាប សុវត្ថិ បាន​ចូលរួម​ក្នុង​កម្មវិធី​ប្រគំ​តន្ត្រី សុខភាព​មាតាពិភពលោក ដែល​រៀបចំឡើង​ដោយ អង្គការ យូ​នី​សេ​ហ្វ (UNICEF) ស្ដីពី “​សប្ដាហ៍​ពិភពលោក បំបៅកូន​ដោយ​ទឹកដោះ​ម្ដាយ​” (World Breastfeeding Week) និង​មានការ​ផ្សាយ​ផ្ទាល់​ក្នុង​ទូរទស្សន៍ប៉ុស្តិ៍​លេខ​ ៣ ផងដែរ។

ក្រោមការខិតខំប្រឹងប្រែងរបស់លោកក៏បានទទួលសមិទ្ធផលជាច្រើនដូចជា៖ នៅឆ្នាំ ២០០០ បទ ” មានថ្មីម្ដេចក៏មិនប្រាប់” បានក្លាយជា Top1 Music Apsara FM, ឆ្នាំ ២០០៣ ព្រាប សុវត្ថិ ក៏បានត្រូវអញ្ជើញឲ្យចូលរួមក្នុងការប្រគំតន្ដ្រី J-ASEAN Pops តំណាងឲ្យប្រទេសកម្ពុជា, ឆ្នាំ ២០០៥ បទ ” U Better Not Come ” ក្លាយជាបទ Top1 Music Apsara FM, ឆ្នាំ ២០១២ ព្រាប សុវត្ថិ បានឈ្នះពានរង្វាន់ Cambodia Top Singer នៅកម្មវិធីអាណាចក្រតារា និងនៅឆ្នាំ ២០១៨ លោកក៏បានឈ្នះពានរង្វាន់ Best Male Artist Of The Year។

ក្នុងការជ្រកក្រោមដំបូលផលិតកម្មហង្សមាស លោកក៏បានក្លាយជាគណៈកម្មាធិការកម្មវិធីធំៗមាន៖ Cambodia Idol, X Factor Cambodia, The Voice Kid Cambodia។ ទន្ទឹមនឹងភាពល្បីល្បាយមិនថមថយ នៅឆ្នាំ ២០២០ ម្ចាស់បទ មានថ្មីម៉េចក៏មិនប្រាប់ ក៏បានសម្រេចចិត្តចាកចេញពីផលិតកម្មហង្សមាស បោះជំហានទៅផលិតកម្ម Galaxy Navatra ដែលមានអ្នកឧកញ៉ា ឡេង ណាវ៉ាត្រា ជាម្ចាស់ផលិតកម្ម។

គួររំលឹកថា ក្រៅពីការច្រៀង លោក ព្រាប សុវត្ថិ ក៏មានមុខជំនួញធំៗកាន់កាប់ផងដែរ មិនថា​អចលនទ្រព្យ ហាងកាត់សក់ ហាងកាត់ដេរ ភោជនីយដ្ឋាន ហើយលោកក៏បាននាំចូលផ្ដាច់មុខសាប៊ូកក់សក់ Preap Sovath Brand លើសពីទៅទៀតនេះ លោកក៏ត្រូវបានព្រះមហាក្សត្រត្រាស់បង្គាប់ផ្ដល់គោរមងារជា ឧកញ៉ា កាលពីពេលថ្មីៗនេះ ផងដែរ៕

អត្ថបទ៖ ផានិត