ព្រោះរឿងមួយ ទើប Jisoo សមាជិក Blackpink មិនទាន់ចេញបទចម្រៀងទោលដូចមិត្តរួមក្រុម

ស្របពេលដែលមិត្តរួមក្រុមទាំង ៣នាក់ បានចេញបទចម្រៀងទោលរៀងៗខ្លួន Jisoo បងស្រីធំក្រុម Blackpink មិនទាន់មានគម្រោងចេញបទទោលនៅឡើយ​ ដោយនាងកំពុងបារម្ភលើរឿងមួយ។

ថ្មីៗ​នេះ Jisoo បាន​ផ្ដល់បទសម្ភាសន៍​ពី​សម្ពាធ​នៃ​ការចេញបទចម្រៀង​ទោល ដោយនាងនិយាយថា នាង​មិន​​ចង់​ចេញអាល់ប៊ុម Solo នោះទេ ហើយនាងចង់ប្រឡូកក្នុងវិស័យ​​សម្តែង​ជាជាងការច្រៀងតែឯង។

បន្ទាប់ពីបង្ហាញខ្លួនលើក្របទស្សនាវដ្ដី Rolling Stone តារាស្រីរូបនេះនិងមិត្តរួមក្រុមបានផ្ដល់កិច្ចសម្ភាសន៍ជាមួយអ្នកសារព័ត៌មាន ហើយនាងបង្ហើបអំពីផែនការអនាគតរបស់នាងផងដែរ។ ស្របពេលពេលដែលសមាជិកផ្សេងទៀតនៃក្រុមដូចជា Jennie, Rosé និង Lisa សុទ្ធតែចេញទោល ប៉ុន្តែ Jisoo គឺជាមនុស្សតែម្នាក់គត់ដែលមិនទាន់ចេញបទចម្រៀងផ្ទាល់ខ្លួននៅឡើយ។

ក្នុងអំឡុងពេលសម្ភាសន៍ Jisoo បាននិយាយថា នាងធ្លាប់គិតពីការចេញបទចម្រៀងទោល ប៉ុន្តែបន្ទាប់ពីគិតចុះគិតឡើងជាច្រើនលើកច្រើនសារ នាងបែរជាមានសម្ពាធខ្លាំង ព្រោះនាងមិនដឹងថាអ្នកគាំទ្រត្រូវការអ្វីពីនាង? ហើយតើតន្ត្រីប្រភេទណាដែលគួរជ្រើសរើសនោះទេ។

Jisoo បញ្ជាក់ទៀតថា ខ្លួន​ពិត​ជា​គ្មាន​ចំណង់​ចំណូល​ចិត្ត​នឹង​ការចេញអាល់ប៊ុមទោលឡើយ។ នាង​បាន​សារភាពថា ​ខ្លួនមានភាពខ្វះខាតច្រើនពេលសម្ដែងលើឆាក។ ដូច្នេះឱ្យតែគិតពីការចេញចម្រៀងទោលម្ដងៗ នាងរងសម្ពាធខ្លាំងណាស់ ព្រោះនាងខ្លាចធ្វើមិនបានល្អ។  

​តាមពិតទៅ ស្ទីលសម្តែង និងសំឡេងរបស់ Jisoo ក៏មានមិនអន់ជាងមិត្តរួមក្រុមដទៃទៀតដែរ។ ដូច្នេះហើយ បើទោះជានាងមិនទាន់ចេញបទទោលក៏ពិតមែន ប៉ុន្តែតារាស្រីរូបនេះនៅតែត្រូវអ្នកនិយមលេងអ៊ីនធឺណេតជាច្រើនស្រឡាញ់គាំទ្រ និងបន្តរង់ចាំអាល់ប៊ុម Solo របស់នាងជានិច្ច៕

ប្រែសម្រួល៖ សន្យា

ចុចអាន៖ អាថ៌កំបាំង ៥ យ៉ាង នៃការសម្រកទម្ងន់មិនតមអាហារ ពីតួស្រីក្នុងរឿង “Squid Game”