ព័ត៌មានជាតិ

ភរិយាឌួង ឆាយ ស្តាយពេលវេលា ១៣ ឆ្នាំ ទុកចិត្តលើមនុស្សខុស

បានផុស

៤ years មុន

នៅ

ថ្ងៃសៅរ៍ ១៩ ធ្នូ ២០២០

ដោយ

Dy Bunnara

ក្នុងវិដេអូLive ជាង ៣០ នាទី អ្នកនាងដេត ម៉ាលីណា បានបកស្រាយចំពោះការឈានទៅបែងបាក់ជាមួយឧកញ៉ាឌួង ឆាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាងដេត ម៉ាលីណា បានលើកមូលហេតុឈានទៅផ្តាច់ចំណងអាពាហ៍ពិពាហ៍ជាមួយឧកញ៉ាឌួង ឆាយ ដោយសារអ្នកនាងឆ្អែតឆ្អន់ទង្វើមិនគប្បី ភាពមិនស្មោះត្រង់ដែលអ្នកនាងមិនអាចទ្រាំបានតទៅទៀត។ អ្នកនាងលើកឡើងថា អាពាហ៍ពិពាហ៍របស់នាងជាង ១៣ ឆ្នាំនេះ គឺមានតែទឹកភ្នែក និងសម្ពាធផ្លូវចិត្តតែប៉ុណ្ណោះ។

អ្នកនាងដេត ម៉ាលីណា លាងជម្រះការសង្ស័យទាក់ទងអាពាហ៍ពិពាហ៍ជាមួយឧកញ៉ាឌួង ឆាយ មិនមែនកើតឡើងដោយសារការសម្លឹងឃើញទ្រព្យសម្បត្តិរបស់ស្វាមីនោះទេ។ អ្នកនាងបញ្ជាក់ថា ទ្រព្យសម្បត្តិទាំងនោះគឺបានមកពីការរកស៊ី មិនមានចំណែកណាបានពីក្រុមគ្រួសាររបស់ប្តីនោះដែរ។

ស្រ្តីកូន ៣ ប្រាប់បន្តថា ការបង្ហោះលែងលះឧកញ៉ាឌួង ឆាយ លើហ្វេសបុកក៏មិនមែនចង់ល្បីដែរ។ អ្នកនាងគ្រាន់តែឲ្យមហាជនបានដឹងឮ ពីព្រោះអ្នកនាងក៏ជាបុគ្គលក្នុងក្រសែភ្នែករបស់មហាជន ហើយការលែងលះមិនអាចធ្វើឡើងដោយស្ងាត់ៗបានទេ។

អ្នកនាងចង់បញ្ចប់អាពាហ៍ពិពាហ៍នេះដោយសន្តិវិធី មិនចង់ឲ្យមើលមុខគ្នាលែងត្រង់។ អ្នកនាងចង់ចាកចេញដោយភាពរឹងមាំ ត្រូវទទួលស្គាល់ការពិត ដើម្បីចាប់ផ្តើមថ្មីឡើងវិញ។

ចុងក្រោយ អ្នកនាងស្នើឲ្យមហាជនឈប់សួររឿងទំនាក់ទំនងរបស់អ្នកនាងនិងឧកញ៉ាឌួង ឆាយ គឺលែងពាក់ព័ន្ធអីទៀតហើយ។ ទំនាក់ទំនងរបស់នាងនិងឧកញ៉ាឌួង ឆាយត្រឹមតែជាឪពុកកូនទាំង ៣ របស់នាង មិនមែនជាស្វាមីដូចមុនទេ៕