លម្អិតខ្ទេចគ្មានសល់ អំពីបណ្តឹងអូសបន្លាយរវាង Johnny និង Amber

ប៉ុន្មានសប្ដាហ៍មកនេះ បណ្ដឹងបរិហារកេរ្តិ៍រវាង Johnny Depp និងអតីតភរិយា Amber Heard បានទាក់ទាញចំណាប់អារម្មណ៍មនុស្សរាប់លាននាក់នៅជុំវិញពិភពលោក។ ការកាត់ក្តីចុងក្រោយនេះបានប្រែទៅជាសមរភូមិដ៏ក្តៅគគុក ព្រោះភាគី​នីមួយៗ​សុទ្ធតែអះអាង​ថា ខ្លួន​ជា​ជនរងគ្រោះ​នៃ​អំពើ​ហិង្សា​ក្នុង​គ្រួសារ។ ភស្តុតាងជាច្រើនរួមមាន រូបថត វីដេអូ ឃ្លីប សារសំឡេង និងសាក្សីពីភាគីទាំងសងខាង ត្រូវបានបង្ហាញនៅក្នុងតុលាការ បង្កើតជារឿងអាស្រូវអស់រយៈពេល ៦សប្តាហ៍មកហើយ ហើយថ្ងៃនេះ កម្ពុជាថ្មី នឹងសង្ខេបព្រឹត្តិការណ៍ទាំងអស់នៅខាក្រោម។

ក្តីបរិហារកេរ្តិ៍

ក្នុងឆ្នាំ២០១៩ តារាប្រុស Johnny Depp បានដាក់ពាក្យបណ្តឹង “បរិហារកេរ្តិ៍” ប្រឆាំងនឹង Amber Heard បន្ទាប់ពីនាងចុះផ្សាយអត្ថបទ ដែលមានចំណងជើងថា “ខ្ញុំបាននិយាយប្រឆាំងនឹងអំពើហឹង្សាផ្លូវភេទ – និងប្រឈមមុខនឹងកំហឹងនៃគ្រួសារ” នៅក្នុងកាសែត Washington Post កាលពីឆ្នាំ២០១៨ ។ ពេលនោះ ​Johnny បានអះអាងថា អត្ថបទរបស់ Amber បានបំផ្លាញជីវិតរបស់គាត់ ក៏ដូចជាប៉ះពាល់ដល់អាជីពសម្តែង និងប្រាក់ចំណូលផងដែរ។

ថ្វីត្បិតនៅ​ក្នុង​អត្ថបទ​មិន​បាន​លើក​ឡើង​អំពី​ឈ្មោះ​របស់ Johnny Depp ពិតមែន ប៉ុន្តែគ្រប់គ្នាសុទ្ធតែដឹងថាវាសំដៅដល់តារាប្រុសរូបនេះប្រាកដណាស់។ ២ឆ្នាំមុនអត្ថបទនេះចេញផ្សាយ គឺកំលុងឆ្នាំ២០១៦ Amber បានដាក់ពាក្យបណ្ដឹងទៅតុលាការរដ្ឋកាលីហ្វ័រញ៉ា ដោយចោទប្រកាន់ Johnny ថាបានបោះទូរសព្ទដាក់មុខនាង និងធ្វើបាបរាងកាយនាង ពេលពួកគេនៅមានទំនាក់ទំនងជាមួយគ្នានៅឡើយ។

ត្រឡប់មកឆ្នាំ ២០១៩ វិញ Amber ឆ្លើយតប​នឹង​បណ្តឹង​របស់ Johnny ថា វាជាការបរិហារកេរ្តិ៍ ដែលកើតឡើងតាមរយៈមេធាវីរបស់អតីតស្វាមី លោក Adam Waldman ។ នៅក្នុងសេចក្តីថ្លែងការណ៍មួយនៅក្នុងកាសែត The Daily Mail នាងនិយាយថា Johnny ជាមនុស្សកុហក ហើយថា​ទង្វើ​នេះ​ធ្វើ​ឱ្យ​នាង​គ្មាន​ការងារ​ធ្វើ ហើយ​ត្រូវ​កាត់ចេញ​តួ​ក្នុង​រឿង Aquaman 2។

សាក្សី

ផ្ទុយពីការអះអាងរបស់ Amber ក្រុមមេធាវីរបស់លោក Johnny បញ្ជាក់ថា Amber ទៅវិញទេដែលបានធ្វើបាបរាងកាយ និងផ្លូវចិត្តរបស់អតីតស្វាមី។ មេធាវីរបស់លោក Johnny ​ថ្លែង​ដូច្នេះថា រាងកាយរបស់ Amber មិនដែលឃើញមានរបួសស្នាមអ្វីទេ ហើយការ​ចោទ​ប្រកាន់របស់នាង សុទ្ធសឹង​ជា​ការ​កុហកទាំងអស់។ មេធាវីក៏បានផ្តល់ភស្តុតាងជាច្រើនផងដែររួមមាន រូបថត វីដេអូឃ្លីប និងឃ្លីបសំឡេងដែល Johnny ត្រូវបានគំរាមកំហែង។

បន្ទាប់ពីនោះ ​Amber ស្រាប់តែលើកឡើងថា Johnny ជាមនុស្សប្រមឹក ប្រើថ្នាំញៀន និងចោទប្រកាន់គាត់ពីបទបៀតបៀនផ្លូវកាយ និងផ្លូវភេទរបស់នាង។ មេធាវីរបស់ Amber បានផ្តល់សក្ខីកម្មដោយមានសាក្សីជាច្រើននិយាយដូចៗគ្នាថា ពួកគេបានឃើញ Johnny ស្រវឹងស្រាពិតមែន តែទោះជាយ៉ាងណាសាក្សីរបស់ Amber សារភាពថា ពួកគេមិនដែលឃើញ Johnny វាយធ្វើបាបអតីតភរិយាឡើយ។

សក្ខីកម្ម

Johnny បានផ្តល់សក្ខីកម្មថា គាត់មិនដែលធ្វើបាប Amber ឬស្ត្រីភេទឡើយ តាមពិត Amber ទេដែលជា​មនុស្ស​ប្រើ​ហិង្សា​ក្នុង​ទំនាក់ទំនងប្ដីប្រពន្ធ ដោយនាង​តែងតែ​ខឹងសម្បារ និងជេរ​ប្រមាថ​គាត់ជារឿយៗ។ មិនតែប៉ុណ្ណោះ រឿងរ៉ាវផ្ទុះឡើងរហូតបង្កជាអំពើហិង្សាលើរាងកាយ សុទ្ធតែផ្ដើមចេញពីអតីតភរិយារបស់គាត់ទាំងអស់។ ពេលមួយ Amber ផឹកស្រវឹង ហើយបោះដបស្រាដាក់គាត់ បណ្ដាល​ឱ្យ​​រង​របួស​ម្រាម​ដៃ​ស្តាំទៀតផង។

ភ្លាមៗ​ Amber ច្រានចោលការអះអាងរបស់អតីតស្វាមី ដោយនាង​ថ្លែងថា ​ជាញឹកញាប់ Johnny តែងតែធ្វើបាបនាងនៅពេលដែលស្រវឹង ហើយពេលខ្លះគាត់ដាល់មុខនាង ធ្វើឱ្យនាងហូរឈាមមាត់។ ពេលខ្លះគាត់ទះ​តប់នាង ​សឹង​បាក់​ច្រមុះក៏មាន។ កាលទៅលេងនៅប្រទេសអូស្ត្រាលី Amber ថា អតីតស្វាមីបានរំលោភនាងយ៉ាងឃោរឃៅ និងបំពានផ្លូវភេទនាងដោយញាត់ដបស្រាចូលប្រដាប់ភេទទៀតផង។ នាងបញ្ជាក់ថា ស្នាមរបួសម្រាមដៃស្ដាំរបស់គាត់មិនមែនដោយសារនាងទេ វា​កើត​ឡើង​នៅ​ពេល​ដែលគាត់​វាយ​កម្ទេច​ទូរសព្ទខ្លួនឯងប៉ុណ្ណោះ​។

ទោះយ៉ាងណាក៏ដោយ មេធាវីរបស់ Johnny បានចោទសួរថា ប្រសិនបើ Amber ត្រូវបានរំលោភផ្លូវភេទ និងបៀតបៀនដោយ Johnny ហេតុ​អ្វី​បាន​ជា​គ្មាន​ភស្តុតាងដែល​ទៅ​ជួប​គ្រូពេទ្យ ឬ​ភស្តុតាង​រូបថត​ដែល​បង្ហាញ​ស្លាក​ស្នាម​របស់​នាង? ពេលនោះ ​Amber បានផ្តល់សក្ខីកម្មថា នាងប្រើគ្រឿងសម្អាងដើម្បីបិទបាំងស្លាកស្នាម រួមទាំងការប្រើទឹកកកដើម្បីជួយបន្ថយការហើម ហើយនាងមិនបានទៅជួបគ្រូពេទ្យ ព្រោះវាជារឿងអាម៉ាស់​ ​​មិន​ចង់​ប្រាប់​នរណា​ម្នាក់ឱ្យដឹង។

ទន្ទឹមគ្នាដែរ មេធាវីរបស់ Amber បានបង្ហាញសារមួយដែល​ Johnny ផ្ញើទៅមិត្តរបស់គាត់។ ក្នុងសារបានរៀបរាប់ពីសម្ដី ​Johnny ដែលចង់ទម្លាក់ ​Amber ចូលទៅក្នុងទឹក ហើយដុតនាងចោល។ ឆ្លើយតបនឹងភស្តុតាងនេះ Johnny សារភាពថា គាត់ស្រវឹងខ្លាំងពេក ហើយ​គ្រាន់តែសរសេរលេង​សើច​ប៉ុណ្ណោះ។

បញ្ហាផ្សេងទៀត

បន្ថែមពីលើការកាត់ក្តីលើបទចោទប្រកាន់បរិហារកេរ្តិ៍ ក្នុងអំឡុងពេលផ្តល់សក្ខីកម្មពីភាគីទាំងសងខាង បញ្ហាដ៏គួរឱ្យភ្ញាក់ផ្អើលជាច្រើនបានរីករាលដាលនៅលើអ៊ីនធឺណិត រួមទាំង “លាមកនៅលើគ្រែ” ដែល Johhny បានផ្តល់សក្ខីកម្ម។ ទោះ​ជា​យ៉ាង​ណា ភាគីខាងស្រី ​អះអាង​ថា វា​ជា​លាមក​ឆ្កែ មិនមែនជាលាមករបស់នាងនោះទេ។

ក្នុងអំឡុងពេលតាមដាន មេធាវីរបស់ Amber បានផ្តល់ភស្តុតាងថា វាជាម៉ាកគ្រឿងសម្អាង Milani ដែលកូនក្ដីរបស់ខ្លួនត្រូវការយកតាមខ្លួនគ្រប់ពេល អំឡុងពេលមានទំនាក់ទំនងជាមួយ Johnny ដើម្បីបិទបាំងស្លាកស្នាមនៅលើមុខ។ ទោះយ៉ាងណា អ្នកគាំទ្របាន​បង្ហោះ​ឃ្លីប​មួយ​ក្នុង TikTok ថា ​គ្រឿង​សម្អាង​ដែល​មេធាវី Amber យក​មក​ធ្វើ​ជា​ភស្តុតាង ទើបតែចេញលក់ក្នុងឆ្នាំ២០១៧ ប៉ុន្តែពេលមានបញ្ហាហិង្សារវាង Amber និង Johnny គឺនៅចន្លោះឆ្នាំ២០១៤-២០១៦ ឯណោះទេ។ រឿងនេះបានធ្វើឱ្យអ្នកនិយមលេងអ៊ីនធឺណិតចោទជាសំណួរថា តើ Amber ភ្លេចម៉ាកគ្រឿងសម្អាងដែលនាងប្រើ ឬមួយនាងនិយាយកុហក?

ស្របពេលជាមួយគ្នានេះ វេជ្ជបណ្ឌិត Shannon Curry ចិត្តវិទូផ្នែកកោសល្យវិច្ច័យ ដែលបានផ្តល់សក្ខីកម្មជាសាក្សីខាង Johnny Depp និយាយថានៅក្នុងការវាយតម្លៃឯកសាររយៈពេល ១២ម៉ោង និងការពិនិត្យទល់មុខជាមួយ Amber បានរកឃើញ Amber មានបញ្ហាបុគ្គលិកលក្ខណៈលើសព្រំដែន និងជំងឺបុគ្គលិកលក្ខណៈតំណពូជ។ ជាលទ្ធផល Amber មានសតិមិននឹងនរ និងមិនអាចគ្រប់គ្រងខ្លួនឯងបាន។ យ៉ាងណាមិញសាមីខ្លួនច្រានចោលការរកឃើញនេះ នាងថា ខ្លួនមិនមានជំងឺស្ត្រេសក្រោយការប៉ះទង្គិចផ្លូវចិត្តនោះទេ។ ទោះជាយ៉ាងនេះក្តី លោកវេជ្ជបណ្ឌិត Dawn Hughes ដែលជាចិត្តវិទូផ្នែកកោសល្យវិច្ច័យខាង Amber បានផ្តល់សក្ខីកម្មថា នាងមានបញ្ហាប្រាកដមែន ដែលវាជាលទ្ធផលនៃការបែកបាក់ជាមួយ Johnny។

បញ្ហា​មួយ​ទៀត​ដែល​បាន​ក្លាយ​ជា​រឿង​ជជែកគ្នាច្រើននៅលើបណ្ដាញសង្គម គឺការបរិច្ចាគ ដែល Amber បានប្រាប់ប្រព័ន្ធផ្សព្វផ្សាយក្នុងឆ្នាំ២០១៨ ថា នាងនឹងបរិច្ចាគ ៧លានដុល្លារដែលបានមកពីការលែងលះ ចូលទៅមូលនិធិ។ ក្នុងនោះនាងផ្តល់ទៅឱ្យអង្គការសប្បុរសធម៌ Amerivan Civil Liberties Union (ACLU) ចំនួន ៣.៥លានដុល្លារ និងមន្ទីរពេទ្យកុមារ Los Angeles ចំនួន ៣.៥លានដុល្លារ។ យ៉ាងណាក្ដីមេធាវីខាងអតីតស្វាមីនាងរកឃើញថាប្រាក់នោះមិនបានចូលទៅអង្គការសូម្បីបន្តិចឡើយ។

នៅមានការភ្ញាក់ផ្អើលមួយទៀត នៅក្នុងការកាត់ក្តីរបស់អតីតគូស្នេហ៍មួយគូនេះ គឺបន្ទាប់ពីការបង្ហាញខ្លួនរបស់ Kate Moss ដែលជាសាក្សីផ្តល់សក្ខីកម្មខាង Johnny។ Kate Moss ជាបងប្អូនរបស់​ Amber ប៉ុន្តែនាងបានមកធ្វើសាក្សីឱ្យ Johnny ដោយអះអាងថានាងមិនច្រានទម្លាក់ពីលើជណ្ដើរទេ បន្ទាប់ពី Amber ចោទអតីតស្វាមីថា គាត់បានរុញប្អូនស្រីទម្លាក់ពីលើជណ្ដើរ។

អាកប្បកិរិយារបស់អ្នកគាំទ្រនៅលើបណ្តាញសង្គម

ពេញមួយសប្តាហ៍នៃការសាកសួរ ប្រព័ន្ធ​ផ្សព្វផ្សាយ​សង្គមនានាផ្ទុះការ​ជជែកមិនដាច់ស្រេច​ មានទាំងអ្នកគាំទ្រ Johnny និងអ្នកគាំទ្រ​ Amber។ ក្រុមអ្នកគាំទ្ររបស់ ​Johnny Depp បានប្រើប្រាស់ប្រព័ន្ធផ្សព្វផ្សាយសង្គមដើម្បីនិយាយ និងតាមដានយ៉ាងដិតដល់នូវការកាត់ក្តីនេះ និងបានដាក់ hashtag ដ៏ពេញនិយមដូចជា #JusticeforJohnnyDepp នៅលើ TikTok និង Twitter ​ជាដើម។ ចំណែក Amber ក៏មាន hashtag ដែលបង្កើតឡើងដោយអ្នកគាំទ្ររបស់នាងផងដែរ។ ប៉ុន្តែចំនួនអ្នកប្រើប្រាស់តិចជាង hashtag របស់ Johnny ។

ការគាំទ្រ Johnny បានកើនឡើងកាន់តែច្រើនពីមួយថ្ងៃទៅមួយថ្ងៃ ដោយពួកជាច្រើន​ជឿជាក់លើភស្តុតាងរបស់តារាប្រុសរូបនេះ។ ​ដោយឡែកខាង​ Amber វិញពុំ​មាន​ភស្តុតាង​ច្បាស់លាស់​នោះ​ទេ។ ដូច្នេះអ្នកគាំទ្រ ចាប់ផ្ដើមលែងជឿសម្ដីរបស់នាង។

តើសាលក្រមចុងក្រោយនឹងទៅជាយ៉ាងណា? តើ Johnny Depp ឬ Amber Heard នឹងឈ្នះករណីនេះ? ពួកយើងមានតែរង់ចាំតាមដានបន្តទៀតប៉ុណ្ណោះ!

ប្រែសម្រួល៖ សន្យា

ចុចអាន៖ ប្រវត្តិស្នេហារបស់ Johnny Depp និងអតីតភរិយា មុនមានរឿងក្ដីក្ដាំ

ចុចអាន៖ ពេលស្គាល់ប្រវត្តិច្បាស់ ទើបដឹងថា កូនស្រី Jonny Depp ជាមនុស្សមិនធម្មតា