ជីវិតកម្សាន្ដ

បាត់មុខឈឹងពីសិល្ប: ចង់ដឹងទេ ពេលនេះ លីលានជា កំពុងធ្វើអ្វី?

បានផុស

៣ years មុន

នៅ

ថ្ងៃសុក្រ ៣ មិថុនា ២០២២

ដោយ

Sonya

បន្ទាប់ពីលេចមុខជាតួអធិរាជក្នុងខ្សែភាពយន្ត “Mulan” កាលពីឆ្នាំ២០១៩ លោក Jet Li បានត់មុខពីសិល្បៈសូន្យឈឹង ទើបតែថ្មីៗនេះប្រភពទម្លាយថា តាមពិតអតីតតួ លីលានជា កំពុងសោយសុខជាមួយគ្រួសារ និងប្រណិប័តព្រះពុទ្ធសាសនាយ៉ាងស្ងប់ស្ងាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jet Li ឬ លីលានជា ជាតារាក្បាច់គុនដ៏ល្បីក្នុងពិភពកម្សាន្តរបស់ប្រទេសចិន និងជាតារាក្នុងដួងចិត្តរបស់ទស្សនិកជនអាស៊ី រួមទាំងកម្ពុជាផងដែរ។ តារាប្រុសរូបនេះប្រឡូកក្នុងវិស័យភាពយន្តតាំងពីឆ្នាំ១៩៨២ មកម្ល៉េះ ពោលមកទល់នឹងនេះមានរយៈពេល ៣០ឆ្នាំហើយ។ យ៉ាងណាមិញ បច្ចុប្បន្ន លីលានជា បានចូលនិវត្តន៍ ហើយរស់នៅយ៉ាងឯកជន សឹងគ្មានអ្នកដឹងពីសុខទុក្ខឡើយ។

មិនថារស់នៅលាក់ខ្លួនយ៉ាងណា គេនៅតែតាមប្រមាញ់ព័ត៌មានរបស់លោកបានមួយចំនួន។ ប្រភពពី Bestie បានឱ្យដឹងថា សព្វថ្ងៃតារាក្បាច់គុន Jet Li សម្រេចចិត្តឃ្លាតចេញពីវិស័យសិល្បៈ និងពិភពកម្សាន្តហើយ ហើយលោកកំពុងរស់នៅយ៉ាងសុខសាន្តជាមួយគ្រួសារ គ្មានការជាប់ពាក់ព័ន្ធអាជីពសម្ដែងទៀតនោះទេ។ ៣ឆ្នាំចុងក្រោយនេះ លោកចំណាយពេលច្រើនជាមួយព្រះធម៌ ដោយគេសង្កេតឃើញលោកតែងតែទៅធ្វើសមាធិជារឿយៗ។

ក្រៅពីដាក់ខ្លួនជាមួយព្រះពុទ្ធសាសនា តារាសម្ដែងដ៏ល្បីរូបនេះ ក៏បានចំណាយទ្រព្យសម្បត្តិច្រើនសន្ធឹកសន្ធាប់ក្នុងសកម្មភាពសប្បុរសធម៌ផងដែរ។ លោកបានបង្កើតមូលនិធិសប្បុរសធម៌ផ្ទាល់ខ្លួនមួយ ហើយជានិច្ចកាលលោកតែងបរិច្ចាគថវិកាដើម្បីផ្ដល់អាហារជូនសិស្ស ជួយជនក្រីក្រ អ្នកខ្វះខាត ឬរងគ្រោះដោយគ្រោះធម្មជាតិ។

ចំពោះហិរញ្ញវត្ថុវិញ ក្រោយលាលែងពីសិល្បៈ គេដឹងថា បច្ចុប្បន្ន Jet Li សល់ទ្រព្យសម្បត្តិផ្ទាល់ខ្លួនប្រមាណ ៣០០លានដុល្លារអាមេរិក៕