ម្ចាស់បទ ‘All I Want For Christmas Is You’ ថ្មីប្រឈមបណ្តឹង ២០ លានដុល្លារ

តារាចម្រៀងស្រី Mariah Carey កាលពីពេលថ្មីៗនេះត្រូវបានអ្នកនិពន្ធ Andy Stone ប្តឹងពីបទយកលំនាំ និងដាកចំណងជើងតាមបទដើម ‘All I Want for Christmas Is You’ ដែលលោកបាននិពន្ធ និងចេញផ្សាយកាលពីជាង ៣០ ឆ្នាំមុន ហើយទាមទារសំណង ២០ លានដុល្លារ ។

យោងតាមសារព័ត៌មាន CBS News បានឲ្យដឹងថា លោក Stone បានដាក់ពាក្យបណ្តឹងរដ្ឋប្បវេណីនៅសង្កាត់ Eastern District នៃរដ្ឋ Louisiana ប្រឆាំងនឹងតារាចម្រៀងអាមេរិកនាង Carey រួមជាមួយសហអ្នកនិពន្ធបទចម្រៀង Walter Afanasieff និងក្រុមតន្ត្រី Sony ជុំវិញបទចោទប្រកាន់ “ការរំលោភសិទ្ធិអ្នកនិពន្ធ និងបង្កើនភាពអយុត្តិធម៌” ។

តុលាការបានអះអាងថា មេធាវីរបស់លោក Stone បានឈានដល់ការប្តឹងទៅកាន់នាង Carey និងចុងចោទផ្សេងទៀតកាលពីខែមេសា ឆ្នាំ ២០២១ ទាក់ទងនឹង “ការប្រើប្រាស់បទចម្រៀងដោយគ្មានការអនុញ្ញាត” ហើយបន្ទាប់ពីមិនអាចឈានដល់ការព្រមព្រៀងគ្នាអំពីសិទ្ធិប្រើប្រាស់នោះ លោក Stone បានស្នើសុំដោយផ្ទាល់ឲ្យបញ្ឈប់សកម្មភាពកេងប្រវ័ញ្ចការងាររបស់គាត់ ។

លោក Stone បានចោទប្រកាន់នាង Carey និង Afanasieff ទៀតថា “មិនបានសុំសិទិ្ធ ឬទទួលបានការអនុញ្ញាត” សម្រាប់ការប្រើប្រាស់ចំណងជើង “All I Want for Christmas Is You” ហើយ Stone មិនដែលផ្តល់ការអនុញ្ញាត ការយល់ព្រម ឬអាជ្ញាប័ណ្ណដើម្បីប្រើចំណងជើងនេះនោះទេ ។

គួរបញ្ជក់ថា លោក Andy Stone បានសហការនិពន្ធ និងថតបទចម្រៀង ‘All I Want for Christmas Is You’ សម្រាប់ក្រុម Vince Vance and the Valiants នៅទីក្រុង Nashville ក្នុងឆ្នាំ ១៩៨៩ ហើយបទនេះក៏បានជាប់ក្នុងតារាង Billboard នារដូវបុណ្យណូអែលឆ្នាំ ១៩៩៣ នោះផងដែរ ៕

ប្រែសម្រួល ៖ នាងតូច

ប្រភព ៖ ET Online