Britney Spears កំពុងរៀបចំពិធីមង្គលការ អតីតស្វាមី ចូលមកអុកឡុក ផ្អើលគេផ្អើលឯង

កាលពីម្សិលមិញនេះ តារា​ចម្រៀងប៉ុប Britney Spears និងគូ​ដណ្ដឹង Sam Asghari បាន​ចាប់​ដៃ​គ្នា​ចូល​រោងការ​ហើយ​ បន្ទាប់ពីទាក់ទងគ្នាជិត ៥ឆ្នាំ។ យ៉ាងណាមិញ អំឡុងពេលកំពុងរៀបចំពិធីមង្គលការ នៅរដ្ឋ​កាលីហ្វ័រនីញ៉ា ស្រាប់តែអតីតស្វាមីរបស់ Britney Spears បានលេចវត្តមានភ្លាមៗ ហើយបានបង្កចលាចលពេញពិធី មិនឱ្យនាងនិងអនាគតស្វាមីរៀបការជាមួយគ្នានោះឡើយ។

ប្រភពព័ត៌មានពី​ NYLON បានឱ្យដឹងថា Alexander ក្នុងវ័យ ៤០ឆ្នាំ ដែលជាអតីតស្វាមីទី១របស់ Britney Spears បានបង្ហាញខ្លួនក្នុងវិមានរបស់នាង ​ដោយចូលទៅខាងក្នុង ស្រែកឡូឡា និងអុកឡុកមិនឱ្យពិធីមង្គលរៀបចំបានរលូននោះទេ។ ​ពេលនោះគាត់ថែមទាំងប្រកាសសារភាពថា គាត់ជាប្ដីដំបូងរបស់ Britney ហើយគាត់ទៅទីនោះដើម្បីបំផ្លាញពិធីទាំងមូលតែម្ដង។ ទោះយ៉ាងណា បន្តិចក្រោយមក Alexander ត្រូវប៉ូលិសក្នុងតំបន់ចាប់ឃាត់ខ្លួន បញ្ជូនទៅប៉ុស្តិ៍ប៉ូលិស ដើម្បីដោះស្រាយតាមផ្លូវច្បាប់។

គួររំលឹកថា មង្គលការ Britney Spears លើកនេះ ជាមង្គលការលើកទី៣ហើយ ខណៈលើកទី១នាងរៀបការបានតែ ៥៥ម៉ោងប៉ុណ្ណោះជាមួយ Alexander កាលពីឆ្នាំ២០០៤ ហើយនៅឆ្នាំដដែលនោះនាងបានរៀបការម្ដងទៀតជាមួយ Kevin Federline (២០០៤-២០០៧)។ ពួកគេមានកូនប្រុសពីរនាក់គឺ Sean Preston អាយុ ១៦ឆ្នាំ និង Jayden James អាយុ ១៥ ឆ្នាំ។

ដោយឡែកមង្គលការនេះ កូនប្រុសទាំងពីរមិនបានចូលរួមឡើយ ចំណែកម្ដាយឪពុក និងប្អូនស្រីរបស់នាងក៏គ្មានវត្តមានដែរ លើកលែងតែបងប្រុសម្នាក់ប៉ុណ្ណោះដែលចូលរួមជាសាច់ញាតិរបស់ Britney Spears៕

ប្រែសម្រួល៖ សន្យា

ចុចអាន៖ ម្ចាស់ក្សត្រី Elizabeth ស្ដេចស្រីបំបែកកំណត់ត្រាពិភពលោក Guinness ច្រើនបំផុត

ចុចអាន៖ Angelina Jolie ត្រូវអតីតស្វាមីហែកកេរ្តិ៍កប់ៗមាត់