ពែកមី ត្រៀមដើរចេញពីCTN ម្ដងទៀត ជាមួយក្រុមកំប្លែងខ្លួន

អ្នកគាំទ្រ និងមហាជនមានការភ្ញាក់ផ្អើលជាថ្មីម្តងទៀត ខណ:ដែលមានការលើកឡើងថា ក្រុមកំប្លែងនាយ ពែកមី ត្រៀមចាកចេញពីការសម្តែងនៅ សុីធីអិន ដែលជាទីកន្លែងសាងកេរ្តិ៍ឈ្មោះល្បីល្បាញរយ:ពេលជាង១០ឆ្នាំមកហើយ។ ដំណឹងនេះអ្នកគាំទ្រគេកំពុងតែតាមដានជាថ្មីថា តើវាសនារបស់ក្រុមនេះ នឹងយ៉ាងណា?។ 

ប្រភពបានឲ្យដឹងថា នាយ ពែកមី និងតារាកំប្លែងមួយចំនួនទៀត ក៏បានត្រៀមដើរចេញពីស្ថានីយ៍ទូរទស្សន៍CTNជាថ្មី ខណ:ក្រុមតារាកំប្លែងទាំងនេះ បង្ហាញអារម្មណ៍មិនពេញចិត្តចំពោះថ្នាក់ដឹកនាំថ្មី ដែលជាជនជាតិបរទេសស្របពេលពួកគេយល់ថា មានការកៀបសង្កត់ និងរិតត្បិតខ្លាំងពេកទៅលើបុគ្គលិកនៅក្នុងនោះ។

បើយោងតាមការបង្ហោះនៅលើបណ្តាញសង្គមTik Tok តារាកំប្លែងនាយ ពែកមី បានប្រកាសថា លោកប្រហែលជាអាចចាកចេញពី CTN មែនទែនហើយ ដោយសារតែកម្មវិធីមួយដែលលោកធ្លាប់សម្តែងនោះ ត្រូវបានគេដកលោកចេញទាំងស្រុង ធ្វើឲ្យលោកមិនសូវមានការងារធ្វើនៅស្ថានីយទូរទស្សន៍មួយនេះ។ នាយ ពែកមី សង្កត់ធ្ងន់ថា “ខ្ញុំប្រហែល ជាឈប់ពីCTNហើយ ដោយសារកម្មវិធី” បាទមេ “ដែលខ្ញុំធ្លាប់ថតនោះឥឡូវវគ្គ២នេះគេដកខ្ញុំចេញទាំងស្រុងហើយ”។

នាយ ពែកមី បញ្ជាក់ថា ប្រហែលអំឡុងខ្ទង់ដើមខែ៧ នឹងមានការចេញជាលិខិតស្នាមត្រឹមត្រូវដោយនៅក្នុងនោះលោកប្រាកដថាមានរូបលោក ,នាយក្រូច, នាយ គ្រឿន និងលោកតា វ៉ិចទ័រ ដែលនឹងត្រូវចាកចេញ ហើយក៏មានពិធីករផ្នែកកីឡាមួយចំនួនទៀតក៏ចាកចេញដូចគ្នា។ លោកថានិយាយនេះប្រាកដជាមានគេស្អប់លោក ប៉ុន្តែលោកត្រូវតែនិយាយខ្លះព្រោះលោកបាននៅCTNនេះប្រមាណ១០ឆ្នាំហើយ ដូច្នេះកុំឲ្យបរទេសដែលមកដឹកនាំថ្មី នេះអាចធ្វើឲ្យពួកលោកខ្ចាត់ខ្ចាយអស់បែបនេះ។

នាយ ពែកមី ក៏ថ្លែងអរគុណដល់CTNផងដែរ ដែលបានផ្តល់កំណើតកំប្លែង និងភាពល្បីល្បាញរហូតមកដល់ពេលសព្វថ្ងៃនេះ។ លោកថា បើលោកឈប់ពី CTN នឹងបន្តធ្វើវីដេអូពីខេត្តស្វាយរៀងឲ្យបងប្អូនបានសើចលេងសប្បាយជាធម្មតា ខណ:បច្ចុប្បន្នលោកក៏ឧស្សាហ៍ទៅស្រុកកំណើតជាញឹកញាប់ដោ យសារនៅស្ថានីយលោកមិនសូវមានការងារធ្វើដូច មុនឡើយ។គេនៅចាំបានថាកន្លងមកនាយ ពែកមី ក៏ ធ្លាប់បានប្រកាសជាសាធារណៈម្តងរួចមកហើយ ពីការដើរចេ ញពីCTNប្រសិនបើមិនមានដំណោះ ស្រាយសម ស្របណាមួយជុំវិញខាងលើនេះ៕

អត្ថបទ៖ ចាន់រ៉ា