តើម្ចាស់បទ Mascara ទឹកភ្នែក Kai មានជីវប្រវត្តិសិល្បៈយ៉ាងដូចម្ដេច?

តារាចម្រៀងប្រុសរាងសង្ហារ សំឡេងក្រអួនក្រឳ ដែលគ្រប់គ្នាស្គាល់ថា ជាម្ចាស់បទ Mascara ទឹកភ្នែក Kai តើមានជីវប្រវត្តិយ៉ាងដូចម្ដេចខ្លះ ទម្រាំមកដល់ថ្ងៃនេះ?

ម្ចាស់បទ “Mascara (ទឹកភ្នែក)” Kai មានឈ្មោះដើមកំណើតថា ទៀន ហ្សេលាង ដែលមានស្រុកកំណើតនៅក្រុងប៉ោយប៉េត ខេត្តបន្ទាយមានជ័យ។ ចាប់ផ្ដើមលើវិថីសិល្បៈ Original Song Kai បានចេញបទចម្រៀងរបស់ខ្លួនជាលើកដំបូងនៅឆ្នាំ ២០១៩ គឺបទ “បាតសមុទ្រ” តែនៅពេលនោះហាក់ដូចជាមិនសូវមានការគាំទ្រខ្លាំងប៉ុន្មាននោះទេ ប៉ុន្តែលោកនៅតែបន្ដសកម្មភាពច្រៀងជាបន្ដបន្ទាប់ដោយព្រោះចំណង់ចំណូលចិត្តរបស់លោកតាំងពីតូចមក។ ដោយមើលឃើញពីសមត្ថភាព ផលិតករក៏ផ្ដល់ឱកាសឲ្យ Kai បានចូលរួមសម្ដែងជាលើកដំបូងគឺរឿង Music Magic love ដែលចូលរួមសម្ដែងជាមួយ Miss Universe Cambodia 2020 រ៉េត សារីតា។

លើសពីនេះទៅទៀត នៅឆ្នាំ ២០២០ បុរសសង្ហារ Kai ក៏បានវិលត្រឡប់មកជាមួយបទ “គេង” ដែលផ្ទុះការគាំទ្រពីសំណាក់យុវវ័យ និងមានការកោតសរសើរជាច្រើនពីទឹកដមសំឡេងដល់ស្រទន់លួងលោមអ្នកស្ដាប់ឲ្យលង់លក់ទៅតាមសំឡេងរបស់លោក។ ទន្ទឹមនឹងភាពជោគជ័យលើវិស័យចម្រៀង Kai ក៏មានឱកាសបានសម្ដែងម្ដងទៀត ក្នុងរឿងភាគបុរាណ “ទេពធីតាព្ភុលមាស” ដែលជាភាពជោគជ័យធំមួយទៀតសម្រាប់លោក។

ក្រៅពីច្រៀង និងសម្ដែង លោក ទៀន ហ្សេលាង ហៅ Kai ក៏អាចនិពន្ធទំនុកចម្រៀង និងលេងហ្គីតាបានថែមទៀតផង ហើយបើគិតមកដល់ពេលនេះ លោកបានចេញបទចម្រៀងជាច្រើន ដែលសុទ្ធសឹងតែទទួលបានការគាំទ្រពីសំណាក់ហ្វេនៗ មានដូចជាបទ បាតសមុទ្រ, Come to say Good bye, គេង, Goodnight, ខ្យល់, លើកោះខ្យង, ដង្ហក់ដង្ហើម និងបទចម្រៀងដែលកំពុងទទួលបានគាំទ្រខ្លាំងនៅពេលថ្មីៗនេះ គឺបទ Mascara (ទឹកភ្នែក) ហើយលោកក៏ជាតារាចម្រៀង Original Song ម្នាក់ដែលតែងតែលើកយកបទចម្រៀងជំនាន់ដើមមកបកស្រាយឡើងវិញ និងមានការគាំទ្រមិនស្ទើដោយព្រោះទឹកដមសំឡេងរបស់លោក។

បើនិយាយពីការសិក្សាវិញ Kai បានបញ្ចប់ការសិក្សាបរិញ្ញាបត្រផ្នែកទេសចរណ៍ ហើយលើសបីនោះទៅទៀតលោកក៏អាចនិយាយបានទៅដល់ ៤ ភាសា គឺ ខ្មែរ អង់គ្លេស ថៃ និងចិន៕

អត្ថបទ៖ ផានិត