អ្នកគាំទ្រនាំគ្នាអរ ក្រោយលេចមុខ ហ្វាន ពីងពីង ក្នុងរឿងភាគកូរ៉េ

កំពូលតារាសម្ដែងចិន ហ្វាន ពីងពីង (Fan Bing Bing) កំពុងទទួលការចាប់អារម្មណ៍យ៉ាងខ្លាំងពីទស្សនិកជន នៅចុងបញ្ចប់ភាគទី១៤ នៃភាពយន្តភាគកូរ៉េខាងត្បូងរឿង “Insider” របស់ទូរទស្សន៍ JTBC បន្ទាប់ពីនាងបង្ហាញខ្លួនជាតួ cameo។

ត្រឡប់ទៅខែកុម្ភៈ ដើមឆ្នាំនេះ មានសេចក្តីរាយការណ៍ថា ហ្វាន ពីងពីង បានធ្វើដំណើរទៅប្រទេសកូរ៉េ ហើយចូលរួមក្នុងការថតរឿងភាគថ្មីមួយ។ ប៉ុន្តែតាំងពីពេលនោះ ព័ត៌មានលម្អិតជុំវិញតារាស្រីរូបនេះ និងពាក្យចចាមអារ៉ាមអំពីការថតភាពយន្ត មិនត្រូវបាននរណាជីកកកាយឡើយ។

ទើបតែនៅថ្ងៃទី២១ ខែកក្កដា កន្លងទៅថ្មីៗនេះ ហ្វាន ពីងពីង ស្រាប់តែលេចមុខនៅក្នុងរឿងភាគឧក្រិដ្ឋកម្មមួយចំណងជើង “Insider” របស់ទូរស្សន៍ JTBC ដោយ នាងសម្ដែងជាតួ cameo។ តាមរយៈតួអង្គដែលចេញមុខតែបន្តិចនេះដែរ ពីងពីង បានធ្វើអ្នកគាំទ្ររបស់នាងរំភើបចិត្តជាខ្លាំង ព្រោះនាងបានស្ងប់ស្ងាត់ពីវិស័យភាពយន្តអស់ពេលជាយូរមកហើយ ក្រោយផ្ទុះរឿងអាស្រូវផ្ទួនៗ។

មិនតែប៉ុណ្ណោះ អ្នកគាំទ្រ ហ្វាន ពីងពីង សង្ឃឹមថា នាងនឹងបន្តបង្ហាញខ្លួននៅក្នុងភាគថ្មីបន្ថែមទៀត មុនពេលរឿង “Insider” បញ្ចប់នៅភាគទី១៦៕

ប្រែសម្រួល៖ សន្យា

ចុចអាន៖ ហ្វេនភ្ញាក់ផ្អើល ក្រោយឃើញសម្រស់ Fan Bingbing ស្រកទម្ងន់ជិត ១០គីឡូ