បវរកញ្ញាចក្រវាលថៃ ២០២២ មានប្រវត្តិចេញពីគំនរសំរាម និងធំធាត់ឡើងដោយសារបាយវត្ត

រាជិនី​សម្រស់របស់ថៃ ​Anna Sueangam-iam ដែលទើបគ្រងមកុដបវរកញ្ញា Miss Universe Thailand ឆ្នាំនេះ ធ្លាប់មានប្រវត្តិចូលប្រកួតវិស័យសម្រស់ជាច្រើនលើក និងជាក្មេងស្រីម្នាក់ដែលធំធាត់ឡើងពីគំនរសំរាម។

​បវរកញ្ញា Anna Sueangam-iam វ័យ ២៣ឆ្នាំ ដណ្ដើមជយលាភីឯកបវរកញ្ញាចក្រវាលថៃ ឆ្នាំ២០២២ មិនមែនដោយសារសំណាងនោះទេ ប៉ុន្តែ​ដោយ​សារ​នាងមានទាំង​រូបសម្រស់ សមត្ថភាព បទពិសោធន៍ ​និងឆន្ទៈដ៏មោះមុតរបស់​នាង​ផ្ទាល់។

តាមពិតទៅ មុនឈានជើងជាន់នៅលើឆាក Miss Universe Thailand បវរកញ្ញារូបនេះធ្លាប់ប្រឡូកក្នុងសង្វៀនសម្រស់ជាច្រើនដងមកហើយ ដែលក្នុងនោះនាងធ្លាប់ទទួលបានតំណែងឯក Miss Mobile Thailand 2018, ធ្លាប់​ចូល​ប្រកួត​បវរកញ្ញា​ថៃ​ឆ្នាំ ២០២០ និងធ្លាប់ជាម្ចាស់ជយលាភីលេខ២ ក្នុងកម្មវិធី Miss Thin Thai Ngam 2020 ថែមទៀតផង។

បន្ទាប់ពីចូលរួមប្រកួតកម្មវិធីសម្រស់នានា Anna បានប្រឡូកចូលវិស័យភាពយន្ត ដែលនាងគឺតារាសម្ដែងមួយរូបឱ្យទូរទស្សន៍ប៉ុស្តិ័លេខ ៨។ ក្នុងនោះនាងធ្លាប់សម្ដែងក្នុងរឿង “Buang Bai Boon” និងរឿង “Waree” ។

ក្រៅពី​វិថី​សម្រស់ និងភាពយន្ត ម្ចាស់មកុដ Miss Universe Thailand រូបនេះ ត្រូវគេទម្លាយពីខ្សែជីវិត​តស៊ូ​ ជូរចត់របស់នាងកាលពីក្មេងផងដែរ។

បវរកញ្ញា Anna Sueangam-iam ជាក្មេងស្រីមួយរូបដែលធ្លាប់រស់នៅក្នុងគ្រួសារដែលមានជីវភាពមិនល្អនោះទេ។ នាងធំឡើងពីគំនរសំរាម ដោយមានឪពុកម្ដាយជាអ្នកប្រមូលសំរាម។ នាងរស់នៅកន្លែង​ចោល​សំរាម​តាំង​ពី​ក្មេង ហើយដោយសារឪពុកនិងម្តាយលែងលះគ្នា Anna ត្រូវរស់នៅជាមួយឪពុក។ ក្រោយមកដោយសារឪពុករបស់នាង មិនសូវបានមើលថែនាងដិតដល់ ទើបគាត់បញ្ជូននាងឱ្យទៅរស់នៅជាមួយជីដូនដែលជាដូនជីនៅឯវត្ត។ Anna រស់នៅជាមួយជីដូននៅវត្តតាំងពីរៀននៅបឋមសិក្សាដល់មធ្យមសិក្សា ដែលកាលណោះនាងធំធាត់ឡើងដោយសារចង្ហាន់សល់ពីព្រះសង្ឃ។

Anna និយាយាថានាង​មិន​បាន​គិត​ថា​នេះ​ជា​ឧបសគ្គ​ក្នុង​ជីវិត​របស់​នាង​ទាល់​តែ​សោះ។ នាងព្យាយាមរៀនសូត្រ រហូតអាចបញ្ចប់បរិញ្ញាប័ត្រគ្រប់គ្រងសណ្ឋាគារ និងទេសចរណ៍ ពីមហាវិទ្យាល័យសិល្បៈ និងវិទ្យាសាស្ត្រ នៃសាកល​វិទ្យា​ល័​យ ​Kasetsart ។ មិនតែប៉ុណ្ណោះ Anna ជាសិស្សពូកែ ដែលទទួលបានលិខិតសរសើរ និង​មេដាយ​មាសពីសាលាទៀតផង។

ក្រោយពេលឡើងគ្រងមកុដជាបវរកញ្ញាចក្រវាលថៃ ឆ្នាំ២០២២ ប្រវត្តិតស៊ូរបស់បវរកញ្ញា Anna Sueangam-iam បាន​ក្លាយ​រឿងរ៉ាវជំរុញទឹកចិត្តទៅដល់មនុស្សជាច្រើន ឱ្យខិតខំជម្នះភាពលំបាក ដើម្បីឈោងចាប់ក្ដីស្រមៃរបស់ខ្លួន៕

ប្រែសម្រួល៖ សន្យា

ចុចអាន៖ ហេង សុទ្ធនិស្ស័យ បញ្ជាក់មូលហេតុមិនទៅប្រកួត Miss Eco International លើឆាកអន្តរជាតិ