ក្រុម BTS ទទួលបានឱកាសពិសេស ពេលកំពុងបំពេញកាតព្វកិច្ចយោធា

រដ្ឋមន្ត្រីការពារជាតិកូរ៉េខាងត្បូងបាននិយាយកាលពីថ្ងៃចន្ទ ទី១ ខែសីហា ថា ក្រុមចម្រៀងបុរស BTS នៅតែអាចចេញសម្តែងនៅក្រៅប្រទេសបាន អំឡុងពេលបម្រើយោធារយៈពេល ២ឆ្នាំ។

ការផ្ដល់ឱកាសពិសេសនេះកើតឡើងចំពេលសមាជិក​ក្រុមចំណាស់​ជាងគេ​គឺ Jin ដែល​មាន​អាយុ ៣០ឆ្នាំ​នៅ​ឆ្នាំ​ក្រោយ ត្រូវចូលបម្រើយោធា ខណៈបច្ចុប្បន្នសភាកំពុងពិភាក្សាអំពីច្បាប់ដែលនឹងកាត់បន្ថយកាតព្វកិច្ចបម្រើយោធាសម្រាប់តារា K-pop ផ្សេងទៀតផងដែរ។

រដ្ឋមន្ត្រីក្រសួងការពារជាតិ Lee Jong-sup បាននិយាយនៅក្នុងកិច្ចប្រជុំសភាថា “ទោះបីជាក្រុម​ BTS ចូលបម្រើយោធាក៏ដោយ រដ្ឋនឹងផ្តល់ឱកាសឱ្យពួកគេហ្វឹកហាត់ និងសម្តែងរួមគ្នាជាធម្មតា ប្រសិនបើមានកាលវិភាគត្រូវចេញទៅប្រគុំតន្ត្រីនៅបរទេស”។ លោកបន្ថែមថា ការអនុញ្ញាតឱ្យ BTS បន្តការសម្តែងអំឡុងពេលបម្រើយោធា មិនបានធ្វើឱ្យប៉ះពាល់ផលប្រយោជន៍ជាតិឡើយ។ យ៉ាងណាមិញ ការអនុញ្ញាតជូននេះ មានត្រឹមតែ ៣សប្ដាហ៍ប៉ុណ្ណោះ។

ដោយឡែក អ្នកគ្រប់គ្រងរបស់ BTS គឺ Big Hit មិនទាន់ឆ្លើយតបទៅនឹងសំណើសុំការអត្ថាធិប្បាយរបស់អ្នកសារព័ត៌មាននៅឡើយទេ ពាក់ព័ន្ធនឹងការផ្ដល់ឱកាសពិសេសមួយនេះ៕

ប្រែសម្រួល៖ សន្យា

ប្រភព៖ Reuters

ចុចអាន៖ តារាស្រីទូរទស្សន៍ TVB ត្រូវជនអនាមិកគំរាមរំលោភ និងសម្លាប់

ចុចអាន៖ តារាកូរ៉េ ៦រូបនេះហើយ មានឱកាសចូលសម្ដែងក្នុងភាពយន្តហូលីវូដ នាឆ្នាំ២០២២