នេន ទុំ សុំទោសនិងបកស្រាយក្រោយរងការរិះគន់រឿងសាក់រូបព្រះព្រហ្មលើកំភួនជើង

ទីបំផុតតារាចម្រៀងរ៉េប​ នេន ទុំ បានចេញមុខសុំទោសមហាជន និងអ្នកគាំទ្រជាសាធារណ: បន្ទាប់ពីផ្ទុះការរិះគន់យ៉ាងចាស់ដៃរឿងចាក់សាក់រូបព្រះព្រហ្មនៅលើកំភួនជើង។

ជាមួយគ្នានៃការចេញមុខសុំទោសមហាជននេះដែរ តារាចម្រៀងរ៉េប នេន ទុំ ក៏បានធ្វើការបកស្រាយដែរថា មូលហេតុដែលលោកចាក់សាក់រូបព្រះព្រហ្មនៅលើកំភួនជើងនេះ គឺដោយសារការស្រលាញ់ ហើយម្យ៉ាងទៀតក៏ព្រោះតែលោកយល់ថា ពេលលោកឡើងឆាកអាចបង្ហាញឱ្យអន្តរជាតិបានឃើញពីវប្បធម៌ខ្មែរយើង ខណ:នៅលើផ្នែកដៃលោក គឺមានសាក់ច្រើនហើយទើបមិនអាចសាក់បានទៀត។

ក្រៅពីការសុំទោសនេះដែរ នេន ទុំ ក៏បានទទួលស្គាល់ថា ដោយសារការស្រលាញ់ពេកទើបលោកហ៊ានលះបង់នូវការឈឺចាប់រយ:ពេលជាច្រើនម៉ោងដើម្បីឲ្យគេសាក់រូបព្រះព្រហ្មនៅលើជើងនេះឡើង។ លោកថា បើមានកំហុសឆ្លងគឺលោកពិតជាសុំទោសដល់មហាជននិងអ្នកគាំទ្រគ្រមជ្ឈដ្ឋានទាំងអស់។

គេនៅចាំបានថា កាលពីថ្ងៃទី០៣ ខែសីហា ឆ្នាំ២០២២កន្លងទៅមហាជន និងអ្នកប្រើប្រាស់បណ្ដាញសង្គមហ្វេសប៊ុកជាច្រើនបានផ្ទុះការរិះគន់ដោយបង្ហាញការមិនចេញចិត្តចំពោះទង្វើរបស់តារាចម្រៀង នេន ទុំ ដែលបានយករូបព្រះកេស​របស់ព្រះព្រហ្មទៅសាក់លើកំភួនជើងហាក់មិនឱ្យតម្លៃវប្បធម៌ដ៏ល្អផូរផង់របស់ខ្មែរ។ ប៉ុន្តែក្រោយពីមានការរិះគន់ពេល នេះ នេនទុំ បានចេញមុខសុំទោសជាសាធារណ:ហើយ៕

អត្ថបទ៖ ចាន់រ៉ា