ជនរងគ្រោះក្នុងឧបទ្ទវហេតុធ្លាក់ LED ភ្ញាក់ដឹងខ្លួន ខណៈការស៊ើបអង្កេតនៅតែបន្ត

អ្នករាំម្នាក់ដែលរងរបួសធ្ងន់ ក្នុងហេតុការណ៍ធ្លាក់អេក្រង់ LED នៅឯការប្រគុំតន្ត្រីរបស់ក្រុមចម្រៀងបុរសហុងកុង Mirror កាលពី ១០ថ្ងៃមុន ពេលនេះបានដឹងខ្លួនហើយ ស្របពេលដែលមួលហេតុនៃគ្រោះថ្នាក់នៅមិនទាន់បញ្ជាក់ឱ្យច្បាស់លាស់។

កាលពីថ្ងៃអាទិត្យម្សិលមិញ ឪពុករបស់ជនរងគ្រោះ គឺលោក Derek Li Shing-lam បានប្រាប់អ្នកសារព័ត៌មានថា កូនប្រុសរបស់គាត់ឈ្មោះ Mo Lee Kai-yin អាយុ ២៧ឆ្នាំ អាចកម្រើកបានខ្លះ និងទាក់ទងកាយវិការមួយចំនួនជាមួយអ្នកជុំវិញ បន្ទាប់ពីវះកាត់ពីរដងរួចមក។

Mo Lee Kai-yin ជាអ្នករាំម្នាក់នៃក្រុម Canto-pop ដែលមានសមាជិក ១២នាក់ ហើយគេបានរងរបួសធ្ងន់ធ្ងរដោយសារប៉ះពាល់ឆ្អឹងតាំងពីក្បាលដល់ខ្នង ខណៈពេលនេះគេ​កំពុងទទួល​ការ​ថែទាំ​យ៉ាង​យកចិត្តទុកដាក់ពី​មន្ទីរពេទ្យ Queen Elizabeth ប៉ុន្តែគ្រូពេទ្យបង្ហើបថា គេអាចនឹងពិការក្រោយជាសះស្បើយ។

បន្ថែមពីលើនេះ គ្រូពេទ្យបានឱ្យដឹងថា បន្ទាប់ពីឧបទ្ទវហេតុដ៏រន្ធត់នេះ Mo Lee Kai-yin មិនត្រឹមតែរងរបួសរហូតសន្លប់ស្ដូកស្ដឹង និងធ្វើការវះកាត់ដល់ទៅពីរដងនោះទេ ប៉ុន្តែអ្នករាំរូបនេះក៏ប៉ះទបង្គិចផ្លូវចិត្តយ៉ាងខ្លាំងផងដែរ។

ដោយឡែក មូលហេតុពិតប្រាកដដែលបណ្ដាលឱ្យកើតមានឧបទ្ទវហេតុធ្លាក់អេក្រង់ LED កាលពីថ្ងៃទី២៨ ខែកក្កដា កន្លងទៅនេះ ក្រុមអ្នកជំនាញកំពុងបន្តស៊ើបអង្កេត និងមិនទាន់បញ្ជាក់មូលហេតុជាក់លាក់ជាផ្លូវការនៅឡើយ៕

ប្រែសម្រួល៖ សន្យា

ប្រភព៖ SCMP

ចុចអាន៖ វិស្វករហុងកុង ទម្លាក់កំហុសលើមនុស្សប៉ុន្មាននាក់នេះ ក្នុងឧបទ្ទវហេតុធ្លាក់ LED