អធិកអធមណាស់ មង្គលការ Jennifer Lopez រៀបចំក្នុងវិមានតម្លៃជិត ១០លានដុល្លារ

បន្ទាប់ពីសម្រេចចុះអេតាស៊ីវិលជាមួយគ្នា និងប្រកាសពិធីអាពាហ៍ពិពាហ៍នៅឯព្រះវិហារ កាលពីថ្ងៃទី១៧ ខែកក្កដា កន្លងទៅ ពេលនេះ តារាសម្ដែង Ben Affleck និងតារាចម្រៀងប៉ុប Jennifer Lopez បានរៀបចំ​​ពិធី​មង្គលការ​ដ៏​ធំ​មួយ ​នៅក្នុងវិមានដែលមានតម្លៃរាប់លានដុល្លារ ដោយមានការចូលរួមពីសំណាក់ក្រុម​គ្រួសារ មិត្តភក្តិ និង​តារា​ល្បីជាច្រើនរូប។

ពិធីដ៏អធិកអធមនេះបានប្រារព្ធធ្វើឡើង បន្ទាប់ពីអ្នកទាំងពីរបានរៀបការលក្ខណៈតូច នៅទីក្រុង Las Vegas កាលខែកក្កដា ដោយកាលណោះមានតែមិត្តភក្តិជិតស្និទ្ធពីរបីនាក់ និងក្រុមគ្រួសារប៉ុណ្ណោះ។ ដោយឡែកលើកនេះ ពួកគេបានរៀបចំពិធីជប់លៀងដ៏ឱឡារឹក នៅក្នុងវិមានឯកជនដែលតម្លៃរហូតដល់ ៨.៩លាន​ដុល្លារ​អាមេរិក ​នៅឯរដ្ឋ Georgia សហរដ្ឋអាមេរិក។

អ្នកសារព័ត៌មានប្រមាញ់បានរូបថតមួយចំនួននៃពិធីមង្គលការតារាល្បីទាំងពីររូប ឃើញថា ពិធីទាំងមូលមានភាពអធិកអធមណាស់ ភ្ញៀវចូលរួមអបអរសាទរយ៉ាងច្រើនកុះករ ចំណែកការរៀបចំពិតជាមានភាពប្រណីតខ្លាំង។ ថ្វីត្បិតមិនទាន់មានប្រភពទម្លាយពីថ្លៃចំណាយក៏ដោយ ប៉ុន្តែទស្សនិកជនអាចស្មានដឹងថា ពិធីនេះចាយប្រាក់ខ្ទង់លានដុល្លារឯណោះ៕

ប្រែសម្រួល៖ សន្យា

ចុចអាន៖ ២០ឆ្នាំមុនធ្លាប់មានចិត្តឲ្យគ្នា ពេលនេះ Jennifer និង Ben ចូលរោងការ