តារាចម្រៀង Original ចេន ផ្តល់ដំបូន្មាន៥​ចំណុច​ដល់ម្ចាស់ពាន

ជាមួយគ្នានៃការចូលរួមអបអរសាទរ និងលើកទឹកចិត្តដល់ម្ចាស់ជ័យលាភីលេខ១ ក្នុងកម្មវិធីប្រឡងចម្រៀងលំដាប់ពិភព​លោក Cambodian Idol រដូវកាលទី៤កំលោះតូច លីម តិចម៉េង តារាចម្រៀង Original លោក ចេន ដែលជារៀមច្បងផងនោះ បានផ្តល់ដំបូន្មាន៥ចំណុចដល់ម្ចាស់ពាន ។

តារាចម្រៀង ចេន បានលើកឡើងថា បងអបអរសាទរប្អូន តិច ម៉េង ដោយក្តីស្រឡាញ់ និងការខិតខំតស៊ូជីវិតរហូតដល់ពេលនេះ តិចម៉េង អាចធ្វើបានសប្បាយឱ្យអស់ពីចិត្តរយៈពេលខ្លីបានហើយប្អូនប្រុស ហើយឆាប់ត្រឡប់មករៀបចំខ្លួនឱ្យបានល្អព្រោះនេះវាគ្រាន់តែជាការចាប់ផ្តើមប៉ុណ្ណោះ ផ្លូវនៅវែងឆ្ងាយណាស់លើកទី១ដែលបងនិយាយព្រោះបងស្រឡាញ់ការតស៊ូប្អូន ។

រៀមច្បងសិល្ប:លោក ចេន បានបន្តថា បងចង់ឱ្យប្អូនជោគជ័យយូរៗល្បីឈ្មោះមានអ្នកស្រឡាញ់គាំទ្រជារៀងរហូតដើម្បីជាធនធានសម្រាប់ប្អូនៗជំនាន់ក្រោយ។ ក្នុងនោះ ចេន ក៏បានដាស់តឿន លីម តិចម៉េង នូវ៥ចំណុចបើចង់ល្បីយូរអង្វែង។

១ .ព្យាយាមចេញបទនិពន្ធថ្មីរបស់ខ្លួនឯងជារៀងរហូត ដោយមិនច្រៀងបទចម្លងពីបរទេស។ ២.ចិត្តធ្ងន់អំណត់ មិនតបត មានតែក្តីស្រឡាញ់សម្រាប់អ្នកគាំទ្រ។ ៣.សុជីវធម៌ សីលធម៌ គោរពចាស់ទុំ។ ៤.គ្មានអំនួត គ្មានការច្រណែន មានតែ​អបអសាទរមិត្តរួមអាជីព និង៥.សំខាន់បំផុតថ្ងៃក្រោយ តិចម៉េង ទៅដល់លំដាប់ណាក៏ដោយសូមកុំបោះបង់អាជីពច្រៀង​ឱ្យសោះ ព្រោះថ្ងៃដែលយើងគ្មានអ្នកត្រូវការខ្លួនទេ មានតែវាប៉ុណ្ណោះដែលនៅជាមួយយើង។

សូមបញ្ជាក់ថា កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី៤កាលពីយប់ថ្ងៃទី២៨ខែសីហាឆ្នាំ២០២២ បានរកឃើញម្ចាស់ជ័យលាភីដែលឈ្នះពាន់រង្វាន់ គឺបានទៅលើកំលោះតូច លីម តិចម៉េង មកពីដែនដីខេត្តកំពង់ចាម៕

អត្ថបទ៖ ចាន់រ៉ា