ខុសជំនាន់ ២២ឆ្នាំ ពេលនេះអតីតតួឯកប្រុស “កប៉ាល់ទីតានិច” ចែកផ្លូវគ្នាជាមួយមិត្តស្រី

អតីតតួឯកប្រុសរឿង “កប៉ាល់ទីតានិច” លោក Leonardo DiCaprio បានចែកផ្លូវគ្នាជាមួយមិត្តស្រី Camila Morrone បន្ទាប់ពីទាក់ទងគ្នាអស់រយៈពេល ៤ឆ្នាំ។ នេះបើតាមការទម្លាយពីមិត្តភក្តិជិតស្និទ្ធរបស់ពួកគេ។

យោងតាមប្រភព​ពី​ទស្សនាវដ្ដី People បានឱ្យដឹងថា ទំនាក់ទំនងស្នេហាអ្នក​ទាំង​ពីរ​ បានផ្ដើមឡើងដំបូង​ក្នុងកំលុង​ខែ​មករា ឆ្នាំ២០១៨ រហូតមកទល់ពេលនេះពួកគេបានរួមរស់ជាមួយគ្នារយៈពេល ៤ឆ្នាំហើយ។ ចំពោះដំណឹងបែកបាក់នេះដែរ សាមីខ្លួនទាំងពីរ មិនមាននរណាចេញមុខបកស្រាយឡើយ ខណៈអ្នកតំណាងរបស់ពួកគេក៏​បាន​បដិសេធ​មិន​ធ្វើ​ការអត្ថាធិប្បាយ​ដែរ។ ​

គួរបញ្ជាក់ថា កន្លងមកគូស្នេហ៍នេះមិនសូវមានការសាទរពីទស្សនិកជនប៉ុន្មានឡើយ ដោយសារតែលោក Leonardo DiCaprio អាយុលើសមិត្តស្រីរហូតដល់ ២២ឆ្នាំ ដែលតារាប្រុសរូបនេះមានវ័យ ៤៧ឆ្នាំ​ រីឯ Camila Morrone មានវ័យ ២៥ឆ្នាំ។

ទោះយ៉ាងណា កាលពីឆ្នាំ២០១៩ Leonardo ធ្លាប់ណែនាំមិត្តស្រីរបស់លោកឱ្យក្រុមគ្រួសារបានស្គាល់ ហើយមកដល់ឆ្នាំ២០២០ ដោយសារជំងឺរាតត្បាត ពួកគេនៅផ្ទះជាមួយគ្នាសឹង ២៤ម៉ោង ក្នុងមួយសប្ដាហ៍។ ពួកគេពិតជា​ស្និទ្ធស្នាល​គ្នាណាស់​! ដូច្នេះក្រោយលេចឮដំណឹងបែកបាក់ គ្រប់គ្នាមិនចង់ជឿនោះទេ ហើយអ្នកគាំទ្រជាច្រើននាក់កំពុងទន្ទឹមចាំមូលហេតុពិតពីក្រោយរឿងនេះ៕

ប្រែសម្រួល៖ សន្យា

ចុចអាន៖ មិនធ្លាប់ដឹងសោះ តួឯករឿងកប៉ាល់ “Titanic” ចាត់ទុកគ្នាលើសពីមិត្ត