សាន ផានិត បញ្ចប់បញ្ហាដោយការវេលុយឲ្យអតិថិជនម្នាក់ដែលទៅអុកឡុកក្នុងហាងលក់ស្បែកជើង

ថ្មីៗនេះមានការភ្ញាក់ផ្អើលមួយបន្ទាប់ពីតារាចម្រៀងម្ចាស់បទ “ជាប់វល់” គឺលោក សាន ផានិត បានកើតរឿងរ៉ាវមិនសប្បាយចិត្តក្រោយមានការជជែកគ្នាយ៉ាងតឹងសរសៃក ខណ:ដែលអតិថិជនម្នាក់យកស្បែកជើងដែលទិញទៅប្រើបានប្រហែល១ខែហើយមកប្ដូរយកថ្មីវិញដោយសម្អាងថា ស្បែកជើងអត់ល្អ។

លោក សាន ផានិត កាលនោះបានបង្ហោះសាររៀបរាប់ថា សូមបងប្អូនជួយពិចារណា! មនុស្សអើយមនុស្សជិះឡានទំនើបមនុស្សធូថ្លៃមកអុកឡុកហាងខ្ញុំទាំងព្រឹក ទិញស្បែកជើង១ខែហើយមកសុំដូរវិញ មិនដូរអោយរករឿង ថតហាងខ្ញុំក្នុងបំណងមិនល្អទៀត តែខ្ញុំក៏បានផ្តល់វីដេអូទៅប៉ូលីសហើយដែរ បើសិនជាផុសប៉ះពាល់អាជីកម្មខ្ញុំ ខ្ញុំមិនអាធ្យាស្រ័យអោយឡើយ ទោះក្នុងតំលៃណាក៏ដោយ។

ប៉ុន្តែទោះបីយ៉ាងណាក៏ដោយក្រោយមកទៀតគេឃើញលោក សាន ផានិត បានបញ្ចេញសារជាថ្មីដោយជ្រើសយកវប្បធម៌សន្តិភាពតាមរយ:ការមិនបង្កបញ្ហាទៀតទេ ដោយលោកសុខចិត្តវេលុយទៅឲ្យអតិថិជនរូបនោះវិញ។ លោក សាន ផានិត បានរៀបរាប់ថា មុននេះបន្តិចគាត់តេមកឡារដាក់ប្រពន្ធខ្ញុំទៀត អ៊ីចឹងតាមសំណើរមហាមិត្តYang Pov ខ្ញុំបានអោយបុគ្គលិកបាញ់លុយជូនគាត់វិញហើយ។

តារាចម្រៀងចាស់វស្សាលោក សាន ផានិត បានបន្តទៀតថា លោកក៏សុំមិនអោយគាត់គាំទ្រទំនិញយើងបន្តទៀតទេដោយសារយើងមិនមានគោលការដូដោះស៊េរីបែបអ៊ីចឹងឡើយ គាត់ទិញស្បែកជើងតាំងថ្ងៃចូលចូលវះកាត់១ខែជាងហើយ។ ក្នុងនោះអ្នកគាំទ្រមួយចំនួនក៏បានផ្តល់ជាយោបល់ដល់លោក សាន ផានិត ដែរថា លោកគួររៀបគោល​ការណ៍សម្រាប់អ្នកទិញ ធ្វើស្លាកដាក់ក្នុងហាងឬវិក័យបត្រថា រាល់ទំនិញទិញហើយរយៈពេលលើសពីថ្ងៃទិញ ៣ថ្ងៃដោយគ្មានផ្តល់ដំណឹងដល់ម្ចាស់ហាងចាត់ទុកជាអាសារបង់៕

អត្ថបទ៖ ចាន់រ៉ា