ផ្ទុះការរិះគន់ក្រោយស្ថាប័នMiss Grand បង្ហាញ​ឈុតគោព្រៃជាឈុតតំណាងជាតិ ក្នុងការប្រកួត​លើឆាកអន្តរជាតិ

អ្នកប្រើប្រាស់បណ្តាញសង្គមហ្វេសប៊ុក និងនិយមតាមដានវិស័យដើរម៉ូដនៅកម្ពុជាបានផ្ទុះការចាប់អារម្មណ៍ជាថ្មីក្រោយស្ថាប័ន Miss Grand បានបង្ហាញឈុតតំណាងជាតិក្នុងការប្រកួតលើឆាកអន្តរជាតិនាប្រទេសឥណ្ឌូនេស៊ីឆាប់ៗខាងមុខ ដែលគេយល់ថា ឈុតនេះច្នៃចេញជាទម្រង់គោព្រៃ ឬក្របីព្រៃ។

ជាក់ស្តែងកាលពីថ្ងៃទី៨ ខែកញ្ញា ឆ្នាំ២០២២ គេឃើញមានមហាជន និងអ្នកគាំទ្រមួយចំនួនបានសម្តែងការមិនពេញចិត្តនិងធ្វើការរិះគន់ទៅលើឈុតដែលច្នៃម៉ូដចេញជារូបសត្វគោព្រៃជាឈុតតំណាងជាតិ Miss Grand Cambodia​2022​គ្រងដោយកញ្ញា ពេជ្រវត្តី សារ៉ាវឌ្ឍី សម្រាប់ការចូលរួមប្រកួតMiss Grand International 2022 នៅប្រទេសឥណ្ឌូនេស៊ី ។

ការផ្ទុះប្រតិកម្ម និងមតិរិះគន់នេះធ្វើឡើងភ្លាមៗស្របពេលដែលនៅលើទំព័រផេកផ្លូវការ Miss Grand Cambodia​បាន បង្ហោះឈុតនេះដោយបញ្ជាក់ថា «នេះជាឈុតតំណាងជាតិ Miss Grand Cambodia 2022 ឆ្នាំនេះសម្រាប់ ការចូលរួមប្រកួតប្រជែងMiss Grand International2022 នៅប្រទេសIndonesia» ។ ក្នុងនោះក៏មានការសូមណូមពរឲ្យប្តូរចេញនូវឈុតនេះសម្រាប់តំណាងជាតផងដែរ។

បើតាមការលើកឡើងរបស់អ្នកប្រើប្រាស់បណ្តាញសង្គមបានបញ្ចេញទស្សន:ថា ឈុតខ្មែរបុរាណល្អផូផង់មានច្រើនណាស់ ហេតុអ្វីយកឈុតជំងឺយរបែបនេះ ប្រុងយកទៅប្រកួតទៅវិញ។ ខ្លះទៀតលើកឡើងដែរថា មានរបស់ល្អៗមិចមិនយកទៅបង្ហាញឲ្យគេឃេីញ និងធ្វេីឲ្យគេស្ញេីតសរសេីរទៅ? ដូចជាឈុតខេត្តស្វាយរៀង ព្រះសីហនុ ព្រះវិហារ កំពត និងត្បូងឃ្មុំ បេីយកឈុតមណ្ឌលគិរីនេះទៅអ្នកជិតខាងគេសេីចស្លាប់ហេីយមិនត្រឹមតែអ្នកជិតខាងទេបងប្អូនរួមជាតិយេីង​ក៏សេីចតែសេីចបែបហួសចិត្ត មានឱកាសតែមិនចាប់ស្រវ៉ាយករបស់ល្អទៅបង្ហាញ។

សូមជម្រាបថា កម្មវិធីMiss Grand Cambodia ក្នុងឆ្នាំ២០២២បានឈានដល់វគ្គផ្ដាច់ព្រ័ត្រ និងបានបញ្ចប់ទៅដោយរលូនកាលពីយប់ថ្ងៃទី២៧ ខែសីហា ឆ្នាំ២០២២កន្លងទៅ ដែលបានរកឃើញម្ចាស់ជ័យលាភីគ្រងមកុដMiss Grand Cambodia ២០២២ គឺបានទៅលើកញ្ញា ពេជ្រវត្តី សារ៉ាវឌ្ឍី ដែលជាបវរកញ្ញាតំណាងឱ្យខេត្តព្រះសីហនុ៕

អត្ថបទ៖ ចាន់រ៉ា