បវរកញ្ញា Han Lay អតីត Miss Grand មីយ៉ាន់ម៉ា ទទួលបានសិទ្ធិរស់នៅប្រទេសកាណាដា

បវរកញ្ញាមីយ៉ាន់ Han Lay អតីត Miss Grand Myanmar ឆ្នាំ២០២០ ទទួលបានសិទ្ធិទៅរស់នៅទឹកដីកាណាដាហើយ បន្ទាប់មានការរដុតដៃដុតជើងពីស្ថាបនិក Miss Grand International លោក Nawat។

នៅព្រឹកថ្ងៃទី២៩ ខែកញ្ញា ឆ្នាំ២០២២ លោក Nawat បានចេញមុខប្រកាសនៅលើផេកផ្លូវការរបស់លោកថា Han Lay នឹងត្រូវទៅរស់នៅផ្តើមជីវិតថ្មីនៅទីក្រុង Toronto ប្រទេសកាណាដា ក្រោយពីអតីតបវរកញ្ញារូបនេះជួបព្យុះភ្លៀងរឿងនយោបាយនៅក្នុងប្រទេសកំណើត កំលុងពេលនាងឡើងឆាកប្រកួត Miss Grand International 2020។

នៅឆាកប្រកួត Miss Grand International 2020 បវរកញ្ញាតំណាងមីយ៉ាន់ម៉ារូបនេះ បាននិយាយរិះគន់ចំៗលើការដឹកនាំរបស់ពួកយោធា ហើយក៏ត្រូវបានអាជ្ញាធរធ្វើទុក្ខបុកម្នេញ រហូតធ្វើឱ្យនាងមិនអាចត្រឡប់ចូលប្រទេសវិញបាន ដូច្នេះនាងត្រូវរស់នៅប្រទេសថៃជាមួយស្ថាប័ន Miss Grand។ យ៉ាងណាមិញ រំលងទៅបាន ២ឆ្នាំ ពេលនេះ Han Lay មានឱកាសទៅរស់នៅបរទេស ប្រកបដោយសន្តិភាព។

បន្ថែមពីលើនេះដែរ លោក Nawat រំពឹងថា Han Lay អាចនឹងក្លាយជា Miss Grand តំណាងកាណាដាមកចូលរួមប្រកួតនៅលើឆាក Miss Grand International ម្តងទៀត៕

ប្រែសម្រួល៖ សន្យា

ចុចអាន៖ បញ្ហាចម្រូងចម្រាសរវាងស្ថាប​និក Miss Grand និងបវរកញ្ញា Engfa ឈានដល់ទីបញ្ចប់

ចុចអាន៖ ម្ដាយ Naphat ចេញមុខមកបញ្ជាក់ទំនាក់ទំនងកូនប្រុសជាមួយ Baifern