ទើបវ័យ១៦ឆ្នាំ យុវតីម្នាក់មានមហិច្ឆតាសម្រេចក្តីស្រមៃលើវិស័យដើរមូដ

អ្នកប្រើប្រាស់បណ្តាញសង្គមហ្វេសប៊ុកជាច្រើនកំពុងផ្ទុះការចាប់អារម្មណ៍ និងបង្ហាញលការគាំទ្រគ្រប់គ្នាបន្ទាប់ពីឃើញការតស៊ូរបស់យុវតីម្នាក់ដែលមានការតាំងចិត្តខ្ពស់ក្នុងការបោះជំហ៊ានលើវិថីសិល្ប:ដើម្បីបំពេញក្តីស្រមៃរបស់នាងនាថ្ងៃអនាគត។

យុវតីដែលមានវ័យទើបតែ១៦ឆ្នាំ និងត្រូវបានគេដឹងថា មានឈ្មោះ វង់សឿន អេរីម៉ា ខណ:បច្ចុប្បន្នប្អូនក៏ជាបេក្ខភាពត្រៀមចូលរួមកម្មវិធីប្រឡងបវរកញ្ញាលំដាប់ថ្នាក់អន្តរជាតិមួយ។ ការលេចវត្តមានរបស់យុវតី វង់សឿន អេរីម៉ា នេះ កំពុងទទួលបានការគាំទ្រ និងសរសើរពីមហាជនជុំវិញរូបសម្រស់ដ៏ស្រស់ផូរផង់ជាមួយកែវភ្នែកស្រទន់ បបូមាត់ស្ដើងស្អាតមាន​ទម្រង់មុខពងក្រពើ កម្ពស់ខ្ពស់សមល្មមដែលធ្វើឲ្យយុវតីរូនេះឆក់បានបេះពីអ្នកគាំទ្រគ្រប់គ្នា។

បើតាមប្រភពបានបង្ហើបឲ្យដឹងថា ដោយសារតែការស្រលាញ់បូករួមមានដុងសិល្ប:ពីកំណើត ទើបធ្វើឲ្យក្មេងស្រីដែលកើតចេញពីត្រកូលកូនកសិករ វង់សឿន អេរីម៉ា កំពុងឈោងចាប់នូវក្តីស្រមៃរបស់ខ្លួនតាមរយ:ការដាក់ចិត្តប្រឡូកលើវិថីសិល្ប:។ យុវតីស្រស់ស្អាតរូបនេះបច្ចុប្បន្នក៏ត្រូវបានគេបញ្ជាក់ថា កំពុងមានម្ចាស់សំអាងការមួយចំនួនទាក់ទងហៅថតជាបន្តបន្ទាប់ផងដែរ។

ជាមួយគ្នានេះ បើតាមការឲ្យដឹងពីសាមីខ្លួនបានលើកឡើងថា សម្រាប់ទេពកោសល្យ និងសមត្ថភាពសិល្ប:សព្វថ្ងៃ គឺប្អូនស្រីអាចច្រៀង សម្តែង និងពិសេសនោះ គឺការដើរម៉ូដតែម្តង ខណ:ពេលនេះប្អូនក៏កំពុងត្រៀមខ្លួនចូលរួមប្រឡងកម្មវិធីបវរកញ្ញាលំដាប់ថ្នាក់អន្តរជាតិដែលធ្វើឡើងឆាប់ៗនេះផងដែរ។ យុវតីរូបនេះក៏បានដាក់ក្តីសង្ឃឹមថា នឹងទទួលបានការគាំទ្រ និងលើកទឹកចិត្តពីមហាជនគ្រប់មជ្ឈដ្ឋាន៕

អត្ថបទ៖ ចាន់រ៉ា