ស្វាមី អឿន ម៉ូលីកា រំភើបរហូតស្រក់ទឹកភ្នែកពេល​​ឃើញរថយន្ដតម្លៃ៣៥ម៉ឺនដុល្លារដឹកមកដាក់មុខផ្ទះ

ស្វាមីតារាស្រីអ្នកនាង អឿន ម៉ូលីកា គឺតារាសម្ដែងលោក ហុង មានុណ បានស្រក់ទឹកភ្នែករលីងរលោងព្រមទាំងសំពះអោបភរិយាលោកនៅពេលដែលឃើញរថយន្ដស៊េរីទំនើបម៉ាក Ferrari-488TB ពណ៌ក្រហមដែលមានតម្លៃ៣៥ម៉ឺនដុល្លារត្រូវបានរថយន្ដខាងក្រុមហ៊ុនដឹកមកដល់ផ្ទះវីឡាររបស់ពួកគេនៅបុរីវារីណា សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។

អ្នកលេងបណ្ដាញសង្គមជាច្រើនបានចាប់អារម្មណ៍នៅពេលដែលឃើញវីដេអូនោះហើយពួកគេលើកឡើងថា នេះហើយត្រូវនឹងពាក្យស្លោក ”សំណាបយោង​ដី ស្ត្រីយោងបុរស” ​ឬជា ”ឧត្តមភរិយា” របស់ស្វាមីនោះព្រោះថា ម៉ូលីកា តែងតែបំ ពេញបំណងស្វាមីជាបន្ដបន្ទាប់ក្រោយពួកគេចាប់ដៃគ្នាជាង២ឆ្នាំមកនេះ​ដោយពួកគេបានផ្លាស់ប្ដូរ​ជីវ​ភាព​ពីរស់នៅផ្ទះជួល​មកមានផ្ទះវីឡារផ្ទាល់ខ្លួនដល់ទៅ២ផ្សេងគ្នា និងទិញបានរថយន្ដប្រណិតៗជិះជាបន្ដបន្ទាប់។

តារាចម្រៀងអ្នកនាង អឿន ម៉ូលីកា បាននិយាយយ៉ាងខ្លីតបសំណួររបស់អ្នកយកព័ត៌មានឆាតតាមហ្វេសប៊ុកដោយប្រាប់​ថា មូលហេតុដែលស្វាមីនាងលោក មានុណ យំស្រក់ទឹកភ្នែកនោះ​ ព្រោះលោកមិន​ដឹងថា នាង​ពិតជាបានទិញរថយន្ដ​នោះ​មែន ស្មានតែPrank តែដល់ពេលគេដឹក​មកទម្លាក់​នៅ​មុខ​ផ្ទះបែបនេះ​ ទើបប្ដីនាង​រំភើប​រហូត​ទប់អារម្មណ៍មិន បានតែម្ដង។

ដោយឡែកមហាជន និងអ្នកលេងបណ្ដាញសង្គមបានសរសើរម៉ូលីកា ចេះតស៊ូ និងភាពប៉ិនប្រសប់របស់នាង ជានារី​ឆ្លាតវៃ ចេះទុកដាក់លុយកាក់ និងកែ​ប្រែពីការរកស៊ីតូច​តាចដែលដំបូង​ឡើយនាងនិងលោក​ម៉ា​នុណ នៅជាសង្សារគ្នាផ្ដើមពីដើមទុនត្រឹមតែទឹកប្រាក់ចំនួន៣០០ដុល្លារប៉ុណ្ណោះ រកស៊ីលក់​ជ្រក់​ជើងមាន់តាមOnline តែពេលនេះពួកគេសល់លុយ​រាប់សែនដុល្លារ ហើយមុខជំនួញរបស់នាងកាន់តែរីកធំ។

ក្រៅពីបានវិវត្តន៍ជីវភាពកាន់តែល្អប្រសើរ​នារយៈពេលចុងក្រោយដោយសម្រេចក្ដីសុបិន្ដក្លាយទៅជាការពិត អតីតតារាចម្រៀងRock ម៉ូលីកា ដែលរៀប​ការជាមួយលោក ហុង មា​នុណ កាលពីថ្ងៃទីទី១៨ ខែមករា ឆ្នាំ២០២០ និងសម្រាលកូនស្រីកាល​ពីថ្ងៃទី៥ ខែកក្កដា ឆ្នាំ២០២០ដោយដាក់ឈ្មោះថា នុណ ច័ន្ទម៉ូនីតា នោះ​គូ​ស្នេ​ហ៍តារា១គូនេះក៏ធ្លាប់បានធ្វើកម្មវិធីសប្បុរសធ័ម៌ជាបន្ដបន្ទាប់ដល់តារាសិល្បករចាស់ជរាគ្មានទី​ពឹង ៕

អត្ថបទ៖ ចាន់ រ៉ា