ភរិយានាយ ចយ ទម្លាយមូលហេតុស្រលាញ់ និងប្រវត្តិផ្តើមស្នេហ៍ដំបូង

ចំណងស្នេហ៍រវាងនាយ​ច​យ និង​ភរិយា​អ្នកនាង ក្វាន់ ឌី គិត​មក​ទល់​ពេលនេះ គឺបាន​រៀបការជាមួយគ្នាមានរយៈពេលប្រមាណជាង៤ឆ្នាំមកហើយដោយក្នុងនោះអ្នកទាំងពីរទទួលបានចំណងដៃកូនដំបូងម្នាក់ជាទីស្រលាញ់។ ម្យ៉ាងទៀតក្នុងរយៈពេលនេះពួកគេបានចាប់ដៃគ្នារកស៊ីនឹងកាន់តែស្រឡាញ់គ្នាទ្វេដង។

ទោះបីជាស្នេហាពួកគេនៅតែផ្អែមល្ហែមក៏ពិតមែន តែជារឿយៗគេឧស្សាហ៍ឃើញភរិយា​នាយ​ចយឧស្សាហ៍បង្ហោះខ្លឹម​សារដាស់តឿនដើម្បីកុំឲ្យប្ដីមានស្រីថ្មីជាបន្តបន្ទាប់។ ស្ថិតត្រង់ចំណុចនេះទើបកន្លងមកគេមានចម្ងល់ថា តើនាយ ចយ មានមន្តស្នេហ៍អ្វីឬមូលហេតុពិសេសអ្វីបានជាភរិយាស្រឡាញ់នាយដល់ថ្នាក់នេះ។

តាមរយ:ចម្ងល់នេះកាលពីថ្មីៗ ភរិយានាយ ចយ គឺអ្នកនាង ខាន់ឌី បានទម្លាយមូលហេតុជុំវិញរឿងរ៉ាវផ្តើមស្នេហ៍គ្រាដំបូងមកដល់បច្ចុប្បន្ន។ នៅក្នុងវីដេអូដែលគេបង្ហោះលើបណ្ដាញសង្គមទីកតុកអ្នកនាង ប៉ិច ក្វាន់​ឌី បានទម្លាយពីប្រវត្តិស្នេហ៍របស់ខ្លួនថា ដំបូងឡើយគឺអ្នកនាងស្គាល់នាយ ចយ តាមរយ:ហ្វេសប៊ុក ហើយនាងជាអ្នកឆាតទៅនាយចយមុន។

អ្នកនាងបាននិយាយទៀតថា កាលពីមុនគេប្រកាន់ស្រីឆាតទៅប្រុសអញ្ចឹងអត់ល្អទេ តែសម័យឥឡូវអត់ប្រកាន់ទេ​បើអញ្ចឹងអត់បាន។ ឆ្លើយតបទៅនឹងសំណួរថា តើនាយ ចយ មានមន្តស្នេហ៍អ្វីនោះ? អ្នកនាងតបថា ដោយសារមុខហ្នឹងហើយ។ អ្នកនាងបញ្ជាក់ថា តាំងពីតូចមកអ្នកនាងអត់ដែលចង់កូពីតាមអ្នកណាគេទេ អញ្ចឹងខ្លួនធ្វើអីប្លែកតែឯងទៅ អញ្ចឹង​ហើយទើបខ្លួនយកប្ដីក៏អត់ឲ្យស្រដៀងគេដែរ។

សូមបញ្ជាក់ថា លោក សែ ភិន ហៅនាយ​ ចយ និងភរិយាអ្នកនាង ប៉ិច ក្វាន់​ឌី បានរៀបអាពាហ៍ពិពាហ៍កាលពី​អំឡុងខែ​កុម្ភៈ ឆ្នាំ​២០១៨ នៅវិមានពិភពថ្មី សែនសុខ។ ពិធី​រៀប​មង្គលការ​នេះត្រូវ​បាន​រៀបចំ​យ៉ាងអធិកអធម អម​ដោយ​តារា​កំប្លែង​ល្បី​ៗ​ជាច្រើននាក់ទៀតផង៕

អត្ថបទ៖ ចាន់រ៉ា