លីម តិចម៉េង ចេញមុខបញ្ជាក់ក្រោយរងការ​រិះគន់ រឿងធ្វើខ្លួន

ស្របពេលសន្ទុះនៃការគាំទ្រ និងប្រជាប្រិយភាពកាន់តែមានការហក់ឡើងខ្លាំងនៅក្នុងទីផ្សាសិល្ប: តារាចម្រៀងវ័យក្មេងនិងម្ចាស់ពាន់រង្វាន់លំដាប់ពិភពលោក លីម តិចម៉េង ថ្មីៗនេះបែរជាមានការរិះគន់ទៅលើការស្លៀកពាក់ ឬតុបតែងខ្លួនជាដើម។

ចំណុចដែលត្រូវបានអ្នកគាំទ្រ និងទស្សនិកជនលើកជាមតិរិះគន់ទៅកំលោះ លីម តិចម៉េង ពេលនេះ គឺដោយសារពួកគេយល់ថាគ្រប់សកម្មភាពធ្វើខ្លួនបែបសាមញ្ញៗ របស់ តិចម៉េង មិនសមជាម្ចាស់ពានទេ។ ចំណែងរឿងធ្វើឲ្យអ្នកគាំទ្រសរសើរ​វិញនោះត្រង់ថា ​លីម តិចម៉េង មានទាំងសមត្ថភាព ទេព​កោសល្យអត្ត​ចរិត​ឫកពារ​ដ៏​ល្អពោរពេញទៅដោយគុណធម៌ មានស្នាមញញឹម​ស្រស់ និងរូបសម្បត្តិគួរស្រឡាញ់ ។

ពាក់ព័ន្ធការរិះគន់លើការរៀបចំខ្លួនលក្ខណ:សាមញ្ញៗនេះ ត្រូវបានតារាចម្រៀង លីម តិចម៉េង បានឆ្លើយតបដោយចិត្តត្រជាក់ទៅកាន់អ្នកគាំទ្រថា មានបងប្អូនខ្លះគាត់រិះគន់ខ្លួនគាត់​ថា​ សាមញ្ញ​ម្ល៉េះទាំង​ការស្លៀកពាក់ ទាំង​ការ​ទៅ​ណា​មក​ណា ទាំង​ការ​និយាយស្ដី ទាំង​អត្ត​ចរិត មិច​ក៏​សាមញ្ញ​ម្ល៉េះ មិច​ក៏​មិនធ្វើឱ្យសមជាម្ចាស់ពាន?។ 

ចំពោះហេតុផលខាងលើនេះ តិចម៉េង បានបកស្រាយដូច្នេះថា សម្រាប់​ខ្ញុំ​បងប្អូន ម្ចាស់​ពានបងប្អូន​ត្រូវយល់ពាក្យថា ម្ចាស់​ពាន​ឱ្យ​បាន​សិន ,ម្ចាស់​ពាន​កើតមកពីណា កើតមក​ពី​ខ្លួនឯង? អត់​មែន​ទេ​ណា​បងប្អូន មិនមែន​ទេ ខ្លួនឯង​តែ​មួយ​ភាគ​ទេ​បងប្អូន​អើយកើតមក​ពី​ក្រុមហ៊ុន ក្រុមហ៊ុន​អ្នក​បង្កើត​កម្មវិធី​មកឱ្យយើងហើយ​បងប្អូន​មហាជន​របស់​យើង​ក្នុង​ប្រ ទេស ដែល​គាត់​ជ្រើសរើស​យក​យើង​ជា​ម្ចាស់​ពាន ហើយ​ឱ្យ​យើង​ទៅ​អស្ចារ្យ​យ៉ាង​មិច ឱ្យ​យើង​ទៅ​ផ្លាស់ប្ដូរចរិតជាម្ចាស់ពានរបៀបមិច។

កំលោះសង្ហា លីម តិចម៉េង និយាយទៀតថា បងប្អូនកុំថាឱ្យខ្ញុំសាមញ្ញអីបងប្អូន ខ្ញុំ​មាន​ថ្ងៃនេះដោយសារបងប្អូនទាំងអស់គ្នាទេ បងប្អូន​ឱ្យ​ខ្ញុំ​ទៅ​ធ្វើ​អស្ចារ្យ ខ្ញុំ​ធ្វើ​អត់​ចេញ​ទេ​បងប្អូន រអៀសចិត្ត​ណាស់​បងប្អូនបើ​គ្មាន​បងប្អូន គ្មាន​កម្មវិធី​ទេ ខ្ញុំ​គ្មាន​ថ្ងៃនេះ​ទេ​។

គួររម្លឹកថា កាលពីយប់ថ្ងៃទី២៨ ខែសីហា ឆ្នាំ២០២២ កន្លងទៅកម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី៤ បានរកឃើញម្ចាស់ជ័យលាភីដែលឈ្នះពានរង្វាន់ គឺបានទៅលើកំលោះតូច លីម តិចម៉េង មកពីដែនដី​ខេត្តកំពង់ចាម។ បន្ទាប់ពីក្លាយជាម្ចាស់ពានលោ លីម តិចម៉េង បច្ចុប្បន្នត្រូវបានគេកត់សម្គាល់ឃើញថា ទាំងប្រជាប្រិយភាព និងសន្ទុះនៃការគាំទ្រពីទស្សនិកជន គឺមានការកើនឡើងជាបន្តបន្ទាប់។ ពិសេសគឺតាមរយ:ការឡើងច្រៀងលើឆាកម្តងៗមានអ្នកទៅគាំទ្រភ្លូកទឹក ភ្លូកដីតែម្តង៕

អត្ថបទ៖ ចាន់រ៉ា