មុនក្លាយជាម្ចាស់មកុដ MGI ឆ្នាំនេះ​ បវរកញ្ញា Isabella Menin ជាសកម្មជនមនុស្សធម៌ និងមានប្រវត្តិអប់រំខ្ពស់

នៅក្នុងវគ្គផ្តាច់ព្រ័ត្រ កាលពីរាត្រីថ្ងៃទី២៥ ខែតុលា ឆ្នាំ២០២២ កម្មវិធី Miss Grand International 2022 បានរកឃើញអ្នកស្នងមកុដជំនាន់ថ្មីរបស់ខ្លួន ដោយបានទៅលើបវរកញ្ញា Isabella Menin ដែលជា Miss Grand តំណាងប្រទេសប្រេស៊ីល។

ម្ចាស់មកុដរូបនេះ មិនត្រឹមតែមានរូបសម្រស់ស្រស់ស្អាតប៉ុណ្ណោះទេ ប៉ុន្តែសមត្ថភាព ទេពកោសល្យ និងចំណេះដឹងរបស់នាងក៏ខ្លាំងមិនធម្មតា ជាពិសេសនាងមានប្រវត្តិការសិក្សាខ្ពស់ និងជាស្ថាបនិកគម្រោងមនុស្សធម៌មួយទៀតផង។

បវរកញ្ញា Isabella Menin កើតនៅរដ្ឋ São Paulo ប្រទេសប្រេស៊ីល ដែលនាងជាកូនកាត់ប្រេស៊ីល-អ៊ីតាលី។ នាងបានបញ្ចប់បរិញ្ញាបត្រផ្នែកសេដ្ឋកិច្ចពីសាកលវិទ្យាល័យ Westminster និងបញ្ចប់អនុបណ្ឌិតផ្នែកហិរញ្ញវត្ថុពីសាកលវិទ្យាល័យ College London ហើយនាងចេះនិយាយដល់ទៅ ៦ភាសាគឺ បារាំង អង់គ្លេស អេស្ប៉ាញ ព័រទុយហ្គាល់ អ៊ីតាលី និងភាសាប្រេស៊ីល។ ក្រៅពីមានប្រវត្តិអប់រំល្អ បវរកញ្ញាវ័យ ២៦ឆ្នាំរូបនេះ គឺជាសកម្មជនមនុស្សធម៌ដ៏សកម្មមួយរូប ដោយនាងជាអ្នកផ្ដួចផ្ដើមគំនិត​បង្កើតគម្រោង “Beyond Project” ​ដែលជាគម្រោងជួយជនពិការនៅក្នុងប្រទេសកំណើតរបស់នាង។

មុនពេលចូលរួមប្រកួតកម្មវិធី Miss Grand International 2022 គេបានដឹងថា ​បវរកញ្ញា Isabella មានអាជីពជាតារាម៉ូដែលលំដាប់អន្តរជាតិ និងមានទេពកោសល្យពហុជំនាញទៀតផង។ ម្ចាស់ជយលាភី​ MGI រូបនេះ មិនត្រឹមតែចេះថតម៉ូដយ៉ាងជំនាញនោះទេ នាងក៏ចេះច្រៀងយ៉ាងពិរោះ និងចេះសម្ដែងផងដែរ៕

ប្រែសម្រួល៖ សន្យា

ចុចអាន៖ មិនទាន់ឡើងប្រកួតវគ្គផ្ដាច់ព្រ័ត្រផង បវរកញ្ញា Engfa ឈ្នះពានរង្វាន់មួយបាត់