ពេជ្រ សោភា ឧបត្ថម្ភ៥០០ដុល្លារ និងអំពាវនាវរៃអង្គាសថវិកាជួយព្រឹទ្ធាចារ្យ គង់ ណៃ

តារាចម្រៀងអ្នកនាង ពេជ្រ សោភា បានចេញមុខប្រកូកប្រកាសអំពាវនាវដល់សប្បុរសជនដើម្បីចូលរួមចំណែកជួយដល់ព្រឹទ្ធាចារ្យកោសល្យវោហារ គង់ ណៃ ដែលបច្ចុប្បន្នកំពុងមានជំងឺសម្រាក់នៅមន្ទីរពេទ្យ។

តារាចម្រៀងអ្នកនាង ពេជ្រ សោភា បានបង្ហោះរូបថតភ្ជាប់ខ្លឹមសារអំពាវនាវថា ខ្ញុំជឿជាក់ថាពុកម៉ែពូមីងបងប្អូនពិតជាបានស្គាល់លោកតា គង់ ណៃ ហើយ ហើយក៏បានដឹងដែរថាគាត់កំពុងតែសម្រាកនៅមន្ទីរពេទ្យដើម្បីទទួលនូវការព្យាបាលជំងឺប្រចាំកាយផងដែរ។

អ្នកនាង ពេជ្រ សោភា បានបន្តថា ដើម្បីជាការជួយសម្រួលនូវបន្ទុកការព្យាបាលព្រឹទ្ធាចារ្យ គង់ ណៃ ក្នុងការលើកតម្កើនស្នាដៃសិល្បៈចាប៉ីដងវែងបន្តទៀត នាងខ្ញុំសូមឧបត្ថម្ភថវិកាផ្ទាល់ខ្លួន 500$ និងសូមអំពាវនាវជនរួមជាតិរៃអង្គាសថវិកាតិចក្តីច្រើនក្តីដើម្បីសម្រាលបន្ទុកក្នុងការព្យាបាលលោកតា ។

បន្ថែមពីនេះអ្ននាង ពេជ្រ សោភា លើកឡើងថា អ្នកទាំងអស់គ្នាអាចចូលរួមវិភាគទានបានតាមគណនីលោកតាផ្ទាល់ផងដែរ។ ការចូលរួមរបស់អ្នកទាំងគ្នា ពិតជាមានតម្លៃក្នុងការជួយសម្រាលបន្ទុកព្យាបាលរបស់ព្រឹទ្ធាចារ្យ គង់ ណៃ។

សូមបញ្ជាក់ដែរថា ជាការចូលរួមអបអរសាទរទៅកាន់ព្រឹទ្ធាចារ្យកោសល្យវោហារ គង់ ណៃ ដែលទទួលបានការទស្សនា​១០០លានដងក្នុងបទTime To Rise “បា រមី” បានបង្កើតយុទ្ធនាការ១០០លានរៀលដើម្បីរៃអង្គាសថវិកាតបស្នងព្រឹទ្ធាចារ្យ គង់ ណៃ ៕

អត្ថបទ៖ ចាន់រ៉ា